អតីតមេដឹកនាំកោះតៃវ៉ាន់ លោកស្រី Tsai Ing-wen នឹងទៅបំពេញទស្សនកិច្ចនៅចក្រភពអង់គ្លេស ក្នុងសប្តាហ៍នេះ តាមការអញ្ជើញរបស់សមាជិកសភាអង់គ្លេស ដែលជាដំណើរដ៏រសើបមួយកើតឡើងនៅពេលទីក្រុងឡុងដ្រ៍ កំពុងព្យាយាមពង្រឹងទំនាក់ទំនងជាមួយទីក្រុងប៉េកាំង និងប្រទេសចិន បង្កើនកិច្ចប្រឹងប្រែងដាក់កោះនេះឱ្យនៅឯកោ។

ចក្រភពអង់គ្លេស ដូចជាប្រទេសដទៃទៀតដែរ គឺពុំមានទំនាក់ទំនងការទូតផ្លូវការជាមួយកោះតៃវ៉ាន់ទេ ប៉ុន្តែការផ្លាស់ប្តូរសេដ្ឋកិច្ច និងនយោបាយរវាងភាគីទាំងពីរបានកើនឡើង នៅពេលដែលទីក្រុងប៉េកាំង បង្កើនសម្ពាធផ្នែកយោធា ដើម្បីបង្ខំឱ្យក្រុងតៃប៉ិ ទទួលយកការអះអាងអធិបតេយ្យភាពរបស់ខ្លួនលើកោះស្វ័យគ្រប់គ្រងនេះ។

ការិយាល័យកោះតៃវ៉ាន់និយាយថា លោកស្រី Tsai ដែលបានចុះពីតំណែងមេដឹកនាំកាលពីខែឧសភាឆ្នាំមុន និងត្រូវបានគេស្គាល់ថាជាអ្នករឹងទទឹងនឹងចិន បច្ចុប្បន្នកំពុងស្ថិតនៅប្រទេសលីទុយអានី ហើយនឹងទៅកាន់ដាណឺម៉ាក បន្ទាប់ចក្រភពអង់គ្លេស នៅចុងសប្តាហ៍នេះ។

ការិយាល័យការបរទេសរបស់ចក្រភពអង់គ្លេស មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ គួរឱ្យដឹងថា កាលពីឆ្នាំមុន លោកស្រី Tsai បានទៅទស្សនកិច្ចសាធារណៈរដ្ឋឆេក បារាំង បែលហ្ស៊ិក និងកាណាដា ដោយទាក់ទាញការខឹងសម្បារយ៉ាងខ្លាំងពីទីក្រុងប៉េកាំង ដែលបានថ្កោលទោសលោកស្រី Tsai ម្តងហើយម្តងទៀតថាជា "ជនផ្ដាច់ខ្លួន"៕