រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ប្រទេសអ៊ីរ៉ង់ ដែលជាផ្នែកមួយនៃការចរចាជាមួយសហរដ្ឋអាមេរិក អាចកំណត់កម្រិតនៃការចម្រាញ់សារធាតុអ៊ុយរ៉ានីញ៉ូម ឬបរិមាណរបស់វា ប៉ុន្តែមិនមានបំណងបោះបង់ចោលបច្ចេកវិទ្យានេះទាំងស្រុងនោះទេ។

លោកបាននិយាយនៅលើប៉ុស្តិ៍ទូរទស្សន៍រដ្ឋអ៊ីរ៉ង់ IRIB បន្ទាប់ពីការពិគ្រោះយោបល់ជាមួយសហរដ្ឋអាមេ   រិកនៅទីក្រុង Muscat ប្រទេសអូម៉ង់ថា៖«តាមគំនិតរបស់យើង ប្រធានបទនៃការចម្រាញ់សារធាតុអ៊ុយរ៉ានីញ៉ូម មិនមែនជាប្រធានបទដែលត្រូវពិភាក្សាទេ ប្រធានបទនេះ នឹងបន្តទៅទៀត។ ពុំអាចមានការរំពឹងទុកណាមួយលើប្រធានបទនេះទេ។ វាអាចមានការរឹតបន្តឹងមួយចំនួនលើកម្រិត ឬបរិមាណនៃការចម្រាញ់សារធាតុអ៊ុយរ៉ានីញ៉ូម ដើម្បីកសាងទំនុកចិត្ត»។ 

លោក Araghchi បានបន្ថែមថា៖«អនុវត្តដូចគ្នាចំពោះបញ្ហានៃការដកទណ្ឌកម្ម នេះគឺជាមូលដ្ឋាននៃការចរចា។ កិច្ចព្រមព្រៀងមួយ ត្រូវបានឈានដល់រវាងភាគីទាំងពីរលើបញ្ហានេះ។ ដូចដែលខ្ញុំបាននិយាយរួចមកហើយថា ជំហរដែលមានការខ្វែងគំនិតគ្នា បានកាន់តែជិតគ្នាជាងមុនហើយ»។

កាលពីថ្ងៃអាទិត្យ អ៊ីរ៉ង់ និងអាមេរិក បានធ្វើការចរចាជុំទី៤ ដែលសម្រុះសម្រួលដោយប្រទេសអូម៉ង់ ដើម្បីដោះស្រាយបញ្ហានុយក្លេអ៊ែររបស់ក្រុងតេអេរ៉ង់។ គណៈប្រតិភូអ៊ីរ៉ង់ដែលចូលរួមកច្ចពិគ្រោះយោបល់នោះត្រូវបានដឹកនាំដោយលោក Araghchi ខណៈគណៈប្រតិភូអាមេរិកដឹកនាំដោយបេសកជនពិសេសអាមេ  រិកលោក Steven Witkoff។

កាលពីថ្ងៃព្រហស្បតិ៍ លោក Witkoff បានទាមទារឲ្យសាធារណរដ្ឋឥស្លាមបោះបង់ចោលទាំងស្រុងនូវការចម្រាញ់សារធាតុអ៊ុយរ៉ានីញ៉ូម ដែលបានបង្កប់ន័យថា ការរុះរើរោងចក្រនុយក្លេអ៊ែរនៅ Isfahan, Natanz និង Fordo។ លោកបានព្រមានថា ប្រសិនបើរឿងនេះ មិនបានសម្រេច នៅថ្ងៃអាទិត្យទេ ការចរចានឹងត្រូវបញ្ចប់ ហើយសហរដ្ឋអាមេរិក នឹងអនុវត្តផ្លូវផ្សេង។ ជាការឆ្លើយតប លោក Araghchi បាននិយាយថា អ៊ី   រ៉ង់នឹងមិនបោះបង់សិទ្ធិរបស់ខ្លួន ក្នុងការបន្តកម្មវិធីនុយក្លេអ៊ែរស៊ីវិល រួមទាំងការចម្រាញ់សារធាតុអ៊ុយរ៉ានីញ៉ូមផងដែរ។