ទូរទស្សន៍ Al Jazeera របស់ប្រទេសកាតា បានរាយការណ៍ថា យ៉ាងហោចណាស់មនុស្ស ១៥នាក់ បានស្លាប់ ដោយសារការវាយប្រហាររបស់កងទ័ពអ៊ីស្រាអែល ទៅលើអគារសិក្សាមួយកន្លែង នៅភាគខាងជើងតំបន់ហ្កាហ្សាស្ទ្រីប។

យោងតាមប៉ុស្តិ៍ទូរទស្សន៍ កងទ័ពអាកាសអ៊ីស្រាអែល បានធ្វើការវាយប្រហារជាបន្តបន្ទាប់ទៅលើអគារសាលាមត្តេយ្យមួយ នៅក្នុងជំរំJabalia ភាគខាងជើងនៃដែនដីប៉ាឡេស្ទីន។ ដោយសារការទម្លាក់គ្រាប់បែក យ៉ាងហោចណាស់ជនភៀសខ្លួន ១៥នាក់ នៅខាងក្នុង ត្រូវបានសម្លាប់ រួមទាំងកុមារផងដែរ។

ប៉ុស្តិ៍ទូរទស្សន៍ក៏រាយការណ៍ផងដែរថា ក្នុងរយៈពេល ២៤ម៉ោងកន្លងទៅនេះ ក្នុងអំឡុងពេលនៃការវាយប្រហារ និងការវាយឆ្មក់របស់កងកម្លាំងការពារអ៊ីស្រាអែល នៅតំបន់ហ្កាហ្សាស្ទ្រីប មានជនជាតិប៉ាឡេស្ទីន យ៉ាងតិច ៤០នាក់ បានស្លាប់ និងជាង ៨០នាក់ បានរងរបួស។ នេះ នាំមកនូវចំនួនអ្នកស្លាប់សរុប នៅក្នុងតំបន់នេះ ចាប់តាំងពីជម្លោះអ៊ីស្រាអែល និងប៉ាឡេស្ទីន បានកើនឡើងក្នុងខែតុលា ឆ្នាំ ២០២៣ ឡើងដល់ ៥២.៨២៩នាក់ ជាមួយនឹងជនជាតិប៉ាឡេស្ទីន ១១៩.៥៥៤នាក់ផ្សេងទៀត បានរងរបួស នៅក្នុងការប្រយុទ្ធគ្នា។