អ្នកនាំពាក្យវិមានក្រឹមឡាំង បានឲ្យដឹងនៅក្នុងបទសម្ភាសន៍ថ្មីមួយថា អ៊ុយក្រែនត្រូវទទួលខុសត្រូវ ចំពោះការដែលមិនអាចធ្វើឲ្យមានវឌ្ឍនភាពក្នុងកិច្ចចរចាសន្តិភាព ហើយបានប្តេជ្ញាថា ការវាយលុករបស់រុស្ស៊ី នឹង «បន្តមាន» ទោះបីជាក្រុងគីវ យល់ស្របជាមួយកិច្ចព្រមព្រៀងដែលគាំទ្រដោយសហរដ្ឋអាមេរិកក៏ដោយ។

ដោយប្រទេសនីមួយៗនៅតែមិនទាន់ឈានដល់បទឈប់បាញ់ជាផ្លូវការ ឯកអគ្គរដ្ឋទូតរបស់អ៊ុយក្រែន និងរុស្ស៊ី បានបង្ហាញខ្លួន សម្រាប់កិច្ចសម្ភាសន៍បដិបក្ខនឹងគ្នា កាលពីថ្ងៃអាទិត្យ (ទី១១ ខែឧសភា) ជាមួយប្រព័ន្ធផ្សព្វផ្សាយ ABC News។ លោក Dmitry Peskov អ្នកនាំពាក្យរបស់លោក Vladimir Putin បាននិយាយទៅកាន់ពិធីការិនី Martha Raddatz របស់ប្រព័ន្ធផ្សព្វផ្សាយ ABC ក្នុងទីក្រុងមូស្គូ។

អំឡុងកិច្ចសម្ភាសន៍នោះ លោក Peskov បានអះអាងថា៖ «អ៊ុយក្រែនកំពុងព្យាយាមគេចពីការចរចា»។ លោកស្រី Raddatz បានកាត់ពាក្យសម្ដីនោះ ដោយលើកឡើងថា៖ «អ៊ុយក្រែននិយាយថា ពួកគេបានត្រៀមខ្លួនរួចរាល់ហើយ សម្រាប់បទឈប់បាញ់នាពេលនេះ នោះគឺបទឈប់បាញ់រយៈពេល ៣០ថ្ងៃ»។ លោក Peskov បានលើកឡើងថា៖ «ប៉ុន្តែពួកគេមិនទាន់ត្រៀមខ្លួន សម្រាប់ការចរចាភ្លាមៗនោះឡើយ។ លោកប្រធានាធិបតី Putin កំពុងធ្វើអ្វីគ្រប់យ៉ាងដែលអាចធ្វើទៅបាន ដើម្បីដោះស្រាយបញ្ហា ដើម្បីសម្រេចបាននូវដំណោះស្រាយដោយសន្តិភាព និងការទូត។ ប៉ុន្តែដោយគ្មានមធ្យោបាយសន្តិភាព និងប្រជាធិបតេយ្យ យើងត្រូវតែបន្តប្រតិបត្តិការយោធា»។ 

លោកបាននិយាយបន្តថា ការដឹកជញ្ជូនសព្វាវុធរបស់សហរដ្ឋអាមេរិក និងអឺរ៉ុបទៅកាន់ទីក្រុងគីវ នឹងត្រូវតែបញ្ឈប់ ដើម្បីឲ្យកិច្ចពិភាក្សាទាំងនោះកើតឡើង។ លោកបានទទូចថា អ៊ុយក្រែន «មិនទាន់ត្រៀមខ្លួនសម្រាប់ការចរចាភ្លាមៗនោះទេ»។

ដោយឡែកឯកអគ្គរដ្ឋទូតអ៊ុយក្រែនប្រចាំនៅសហរដ្ឋអាមេរិក លោកស្រី Oksana Markarova បានអង្គុយនៅក្នុងស្ទូឌីយ៉ូរបស់ប្រព័ន្ធផ្ព្វផ្សាយ ABC News សម្រាប់បទសម្ភាសន៍ជាមួយពិធីការិនី Raddatz។ លោកស្រីបានច្រានចោលការអះអាងរបស់លោក Peskov ដែលថា អ៊ុយក្រែនកំពុងបដិសេធលទ្ធភាពនៃកិច្ចចរចាភ្លាមៗ។ 

លោកស្រីបាននិយាយថា៖ «លោកប្រធានាធិបតី Volodymyr Zelensky ថ្ងៃនេះ បានបញ្ជាក់រួចហើយថា ពិតណាស់ អ៊ុយក្រែនត្រៀមខ្លួនជាស្រេចក្នុងការចរចា»។ លោកស្រី Markarova បានសង្កត់ធ្ងន់ថា៖ «យើងបានឮពាក្យនោះខ្លាំងៗ និងច្បាស់ពីលោកប្រធានាធិបតី (Donald) Trump ថា បទឈប់បាញ់គួរតែពេញលេញ និងគ្មានលក្ខខណ្ឌ។ ហើយយើងបានឮពីមេដឹកនាំអឺរ៉ុបផ្សេងទៀត។ គ្មាននរណាម្នាក់ចង់បានសន្តិភាពជាងអ៊ុយក្រែននោះទេ។ សំណួរថ្ងៃនេះ គឺថា តើរុស្ស៊ីចង់បានវាដែរ ឬទេ»៕