ក្រុមស្ម័គ្រចិត្តនៅទីក្រុង Misrata ប្រទេសលីប៊ី បានចាប់ផ្តើមគំនិតផ្តួចផ្តើមរៃអង្គាសប្រាក់ ដើម្បីគាំទ្រជនប៉ាឡេស្ទីននៅតំបន់ហ្កាហ្សាស្រ្ទីប ដាក់ប្រអប់បរិច្ចាគប្រាក់នៅក្រៅព្រះវិហារ អំឡុងការអធិស្ឋានថ្ងៃសុក្រ ។

យុទ្ធនាការក្រោមស្លាក “"យុទ្ធនាការរៃអង្គាសប្រាក់សម្រាប់ពលរដ្ឋហ្គាហ្សា បន្ទាប់ពីការអធិស្ឋានថ្ងៃសុក្រ” ឃើញក្រុមស្ម័គ្រចិត្តលើកទឹកចិត្តក្រុមថ្វាយបង្គំព្រះ នៅក្រៅវិហារ ដើម្បីរួមចំណែកជាសាមគ្គីភាពជាមួយជនប៉ាឡេស្ទីននៅតំបន់ហ្កាហ្សា ។

ក្រោយកាអធិស្ឋានថ្ងៃសុក្រ ប្រជាពលរដ្ឋលីប៊ី នាំគ្នាដង្ហែរក្បួនតាមផ្លូវនៅទីក្រុង Misrata ដើម្បីគាំទ្រតំបន់ហ្កាហ្សា ហើយក្មេងៗនំាគ្នាកាន់ចានគ្មានអាហារ ជានិមិត្តរូបដល់ការគំរាមកំហែងគ្រោះទុរ្ភិក្សជិតកើតមាននៅដែនដីបិទច្រកមួយនេះ ដូចដែលអង្គការសហប្រជាជាតិ បានព្រមាន ។

អ៊ីស្រាអែល បានកាត់បន្ថយការផ្គត់ផ្គង់ជំនួយភាគច្រើនចូលទៅក្នុងដែនដីមួយនេះ ក្រោយការផ្ទុះសង្រ្គាមរវាងអ៊ីស្រាអែល និងក្រុមហាម៉ាស កាលពីខែតុលា ឆ្នាំ ២០២៣ ។ ពួកគេបានអនុញ្ញាតឲ្យជំនួយចូលតំបន់ហ្កាហ្សា អំឡុងបទឈប់បាញ់ដ៏ផុយស្រួយដែលបានចាប់ផ្តើមកាលពីខែមករា ឆ្នាំនេះ ប៉ុន្តែពួកគេបានកាត់ផ្តាច់ការផ្គត់ផ្គង់ទាំងស្រុង ពេលដែលពួកគេចាប់ផ្តើមការវាយលុករបស់ពួកគេឡើងវិញលើក្រុមជីវពលប៉ាឡេស្ទីនហាម៉ាស កាលពីខែមីនា ឆ្នាំនេះ ។ 

អ៊ីស្រាអែល និយាយថា ពួកគេមានគម្រោងបង្កើនយុទ្ធនាការសឹករបស់ខ្លួននៅតំបន់ហ្កាហ្សា ដែលត្រូវបានបំផ្លិចបំផ្លាញស្ទើខ្ទេចខ្ទី អំឡុងសង្រ្គាម ។

ការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា ឆ្នាំ ២០២៣ បានសម្លាប់មនុស្ស ១.២០០នាក់ និងចាប់មនុស្ស ២៥១នាក់ ធ្វើជាចំណាប់ថ្នូរ យកទៅកាន់តំបន់ហ្កាហ្សា ។ យុទ្ធនាការរបស់អ៊ីស្រាអែល បានសម្លាប់ជនប៉ាឡេស្ទីនជាង ៥២.០០០នាក់ ៕