​

អ៊ីស្រាអែលបានស្នើសុំឲ្យចៅក្រមនៅតុលាការព្រហ្មទណ្ឌអន្តរជាតិ (ICC) ទម្លាក់ចោលដីកាចាប់ខ្លួន ដែលត្រូវបានចេញ ចំពោះនាយករដ្ឋមន្ត្រី និងរដ្ឋមន្ត្រីការពារជាតិរបស់ខ្លួន ខណៈដែល ICC ពិនិត្យមើលបញ្ហាប្រឈមរបស់អ៊ីស្រាអែល ចំពោះយុត្តាធិការរបស់ខ្លួន ជុំវិញការប្រព្រឹត្តិសង្រ្គាម នៅតំបន់ហ្កាហ្សា។

ឯកសារដែលបានចេញផ្សាយនៅលើគេហទំព័រ ICC កាលពីយប់ថ្ងៃអាទិត្យ (ទី១២ ខែឧសភា) ក៏បង្ហាញផងដែរថា ប្រទេសអ៊ីស្រាអែលបានស្នើសុំតុលាការបញ្ជាឲ្យរដ្ឋអាជ្ញាផ្អាកការស៊ើបអង្កេតរបស់ខ្លួន ជុំវិញបទឧក្រិដ្ឋកម្មដ៏ឃោរឃៅដែលត្រូវបានចោទប្រកាន់ នៅក្នុងដែនដីប៉ាឡេស្ទីន។ ឯកសារទាំងនោះចុះនៅថ្ងៃទី៩ ខែឧសភា ហើយចុះហត្ថលេខាដោយអគ្គរដ្ឋអាជ្ញារងអ៊ីស្រាអែល លោក Gilad Noam។

គួររំលឹកថា ICC បានចេញដីកាចាប់ខ្លួន កាលពីថ្ងៃទី២១ ខែវិច្ឆិកា ចំពោះនាយករដ្ឋមន្ត្រីអ៊ីស្រាអែល លោក Benjamin Netanyahu និងអតីតប្រមុខការពារជាតិរបស់លោក ក៏ដូចជាមេដឹកនាំក្រុមហាម៉ាស លោក Ibrahim al-Masri ជុំវិញឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ក្នុងជម្លោះ នៅតំបន់ហ្កាហ្សា។

ICC បានប្រាប់ឲ្យដឹងកាលពីខែកុម្ភៈថា ចៅក្រមបានទម្លាក់ចោលដីកាចាប់ខ្លួនលោក al-Masri ដែលត្រូវបានគេស្គាល់ថា លោក Mohammed Deif បន្ទាប់ពីមានរបាយការណ៍គួរឲ្យទុកចិត្តបាន អំពីការស្លាប់របស់លោក។ ចំណែកអ៊ីស្រាអែល ដែលបដិសេធយុត្តាធិការរបស់តុលាការមានមូលដ្ឋាននៅទីក្រុងឡាអេ ប្រទេសហូឡង់ និងដែលបដិសេធមិនបានប្រព្រឹត្តឧក្រិដ្ឋកម្មសង្រ្គាម នៅតំបន់ហ្កាហ្សា កំពុងតវ៉ាជំទាស់នឹងដីកាប្រឆាំងនឹងលោក Netanyahu និងលោក Gallant៕