នៅថ្ងៃចន្ទនេះ កោះតៃវ៉ាន់បានបាញ់ជាលើកដំបូងនូវប្រព័ន្ធរ៉ុក្កែតបច្ចកវិទ្យាខ្ពស់ HIMARSដែលពួកគេបានទិញពីសហរដ្ឋអាមេរិក ស្របពេលដែលកោះស្វ័យគ្រប់គ្រងមួយនេះ បង្កើនសមត្ថភាពរបស់ខ្លួន ក្នុងការរុញច្រានការវាយប្រហារដ៏មានសក្តានុពលណាមួយរបស់ចិន ។

ចិនប្រកាសសិទ្ធិកោះតៃវ៉ាន់ថាជាផ្នែកមួយនៃដែនដីរបស់ខ្លួន ហើយនិងបានគំរាមប្រើកម្លាំង ដើម្បីនាំយកការគ្រប់គ្រងកោះមួយនេះ ។

កោះតៃវ៉ាន់នឹងត្រូវបានគេមានប្រៀបខ្លាំងរឿងអាវុធ ក្នុងករណីផ្ទុះសង្រ្គាមណាមួយនឹងចិន ហើយអស់រយៈពេលច្រើនទសវត្សរ៍មកហើយ ពួកគេបានទិញអាវុធ និងគ្រឿងយុទ្ធោបករណ៍របស់សហរដ្ឋអាមេរិក ជាការទប់ទល់ជាមួយទីក្រុងប៉េកាំង ។

ប្រព័ន្ធមីស៊ីលដំបូងក្នុងចំណោមប្រព័ន្ធមីស៊ីល HIMARS ចំនួន ១១គ្រឿង ត្រូវបានចែកចាយទៅកាន់កោះតៃវ៉ាន់កាលពីខែវិច្ឆិកាកន្លងទៅ ។

គ្រឿងយុទ្ធោបករណ៍បំពាក់លើរថយន្តនេះ អាចបាញ់រ៉ុក្កែតតម្រង់គោលដៅច្បាស់ជាច្រើនគ្រាប់ក្នុងពេលតែមួយ ហើយត្រូវបានប្រើប្រាស់ដោយអ៊ុយក្រែន ប្រឆាំងជាមួយរុស្ស៊ី នៅក្នុងសង្រ្គាមកំពុងបន្តរបស់ពួកគេ ។

នៅថ្ងៃចន្ទនេះ ក្រុមអ្នកសារព័ត៌មាន AFP បានមើល ពេលដែលកងទ័ពកោះតៃវ៉ាន់ បាញ់រ៉ុក្កែតចេញពីប្រព័ន្ធ HIMARS នៅមូលដ្ឋានទ័ព Jiupeng ស្ថិតនៅស្រុកភាគខាងត្បូង Pingtung ៕