រដ្ឋមន្ត្រីការបរទេសបារាំង លោក Jean-Noel Barrot នៅថ្ងៃចន្ទ (ទី១២ ខែឧសភា) នេះ បាននិយាយថា ប្រទេសបារាំងនឹងឆ្លើយតបទៅនឹងការសម្រេច «មិនសមហេតុផល» របស់អាល់ហ្សេរី ក្នុងការបណ្តេញមន្ត្រីបារាំងចំនួន ១៥នាក់ ខណៈដែលទំនាក់ទំនងរវាងប្រទេសទាំង២ កាន់តែអាក្រក់ទៅៗ។

ទំនាក់ទំនងរបស់បារាំងជាមួយអតីតប្រទេសក្រោមអាណានិគមរបស់ខ្លួន មានសភាពស្មុគស្មាញជាយូរមកហើយ ប៉ុន្តែបានប្រែក្លាយទៅជាអាក្រក់ឡើងៗ កាលពីឆ្នាំមុន នៅពេលដែលប្រធានាធិបតីបារាំង លោក Emmanuel Macron បានធ្វើឲ្យអាល់ហ្សេរីខឹងសម្បា ដោយសារការគាំទ្រជំហររបស់ម៉ារ៉ុក នៅតំបន់សាហារ៉ាខាងលិចដែលមានជម្លោះ។

មានការផ្សះផ្សាភាពតានតឹងរយៈពេលខ្លីដែរ កាលពីខែមុន បន្ទាប់ពីលោក Barrot បានធ្វើទស្សនកិច្ចទៅកាន់រដ្ឋធានី Algiers ប៉ុន្តែមួយសប្តាហ៍ក្រោយមក ការបណ្តេញអ្នកការទូតសងសឹកគ្នាទៅវិញទៅមក បានធ្វើឲ្យទំនាក់ទំនងកាន់តែតានតឹងឡើងៗ។

ទីភ្នាក់ងារសារព័ត៌មាន APS របស់អាល់ហ្សេរី បានរាយការណ៍នៅថ្ងៃចន្ទនេះថា ភារធារីរបស់បារាំង បានទទួលដំណឹងថា ភ្នាក់ងារការទូតបារាំងចំនួន ១៥នាក់ មានមុខតំណែងមិនស្របច្បាប់ ហើយនឹងត្រូវបណ្តេញចេញ។

លោក Barrot បានប្រាប់អ្នកសារព័ត៌មាននៅតំបន់ Normandy ថា៖ «ការចាកចេញរបស់ភ្នាក់ងារមានបេសកកម្មបណ្តោះអាសន្ន គឺមិនសមហេតុផលឡើយ ហើយដូចដែលខ្ញុំបានធ្វើកាលពីខែមុន យើងនឹងឆ្លើយតបភ្លាមៗ តាមវិធីសាស្ត្រដ៏រឹងមាំ និងសមាមាត្រ»៕