ប្រទេសអ៊ីរ៉ង់កំពុងរៀបចំត្រៀមសម្រាប់ដំណើរទស្សនកិច្ចរបស់ប្រធានាធិបតីរុស្ស៊ី លោក Vladimir Putin។ នេះបើតាមអ្នកនាំពាក្យរដ្ឋាភិបាលអ៊ីរ៉ង់លោកស្រី Fatemeh Mohajerani ដែលត្រូវបានដកស្រង់ដោយទីភ្នាក់ងារសារព័ត៌មានរដ្ឋ RIA របស់រុស្ស៊ី នៅថ្ងៃចន្ទ (ទី១២ ខែឧសភា) នេះ។

លោកស្រី Mohajerani ត្រូវបានដកស្រង់សម្តីដោយសារព័ត៌មាន RIA ដែលបាននិយាយថា៖ «ការធ្វើដំណើររបស់លោក Putin ទៅកាន់ទីក្រុងតេអេរ៉ង់ បច្ចុប្បន្នកំពុងត្រូវបានធ្វើការ ហើយការរៀបចំត្រៀមកំពុងប្រព្រឹត្តទៅ»។ 

មិនមានការអត្ថាធិប្បាយភ្លាមៗពីវិមានក្រឹមឡាំងនោះឡើយ ពាក់ព័ន្ធនឹងការលើកឡើងនេះ។

គួររំលឹកថា លោក Putin បានជួបពិភាក្សាជាមួយមេដឹកនាំកំពូល លោក Ayatollah Ali Khamenei ក្នុងប្រទេសអ៊ីរ៉ង់ នៅឆ្នាំ២០២២ ដែលជាដំណើរលើកដំបូងរបស់មេដឹកនាំវិមានក្រឹមឡាំងទៅក្រៅពីប្រទេសអតីតសហភាពសូវៀត បន្ទាប់ពីលោកបានបញ្ជូនទាហានរាប់ម៉ឺននាក់ចូលទៅក្នុងប្រទេសអ៊ុយក្រែន នៅថ្ងៃទី២៤ ខែកុម្ភៈ ឆ្នាំដដែល។

បើទោះបីជាទីក្រុងមូស្គូបានទិញអាវុធពីអ៊ីរ៉ង់ សម្រាប់សង្គ្រាមរបស់ខ្លួននៅអ៊ុយក្រែន និងបានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្រ្តរយៈពេល ២០ឆ្នាំជាមួយទីក្រុងតេអេរ៉ង់ នៅដើមឆ្នាំនេះក៏ដោយ ក៏ទំនាក់ទំនងរបស់ប្រទេសទាំង២ គិតចាប់តាំងពីសតវត្សរ៍ទី១៦ មក ជាពេលដែលចំណងទាក់ទងផ្លូវការត្រូវបានបង្កើតឡើង ពេលខ្លះជួបបញ្ហា៕