ភ្នំពេញ៖ អគ្គស្នងការរងនគរបាលជាតិ របស់ថៃ លោកឧត្តមសេនីយ៍ឯក វីរៈឆ័យ ស៊ុមមេត្តា បានថ្លែងអំណរអគុណ ចំពោះសមត្ថកិច្ចរបស់កម្ពុជា ដែលបានសហការ និងជួយសង្គ្រោះពលរដ្ឋខ្លួនជាងមួយរយនាក់ ឲ្យរួចផុត ពីការចាប់ជំរិត និងបង្ខាំងទុក ពីសំណាក់ឧក្រិដ្ឋជនបរទេសនាពេលកន្លងទៅ នៅរាជធានីភ្នំពេញ និងទីក្រុងប៉ោយប៉ែតប្រទេសកម្ពុជានោះ។
នៅក្នុងកិច្ចជំនួបជាមួយ លោកសុខ សុក្រឹត្យា ទីប្រឹក្សាផ្ទាល់សម្តេចតេជោ ហ៊ុន សែន និងជារដ្ឋលេខាធិការ ក្រសួងទេសចរណ៍ កាលពីចុងសប្តាហ៍កន្លងទៅនេះ នៅអគ្គស្នងការដ្ឋានគរបាលថៃ វីរៈឆ័យ ស៊ុមមេត្តា បានលើកឡើងថា មានយុជន-យុវនារីរបស់ថៃយ៉ាងតិចចំនួន ១៥៩នាក់ ត្រូវបានអាជ្ញាធរខ្មែរ ជួយសង្គ្រោះពួកគេឲ្យមានសេរីភាពឡើងវិញ រហូតដល់ពួកគេបានវិលត្រឡប់មកប្រទេសថៃវិញក្រោយពីពួកគេទាំងនោះបានចាញ់បោកមេខ្យល់បរទេសឲ្យមកធ្វើការនៅប្រទេសកម្ពុជា នៅតាមក្លឹបកំសាន្តនានា និងនិងបង្ខំជនជាតិថៃទាំងនោះឲ្យតេតាមទូរស័ព្ទបោកប្រាស់គេដើម្បីជំរិតយកប្រាក់ (CALL CENTER) ជាដើមនោះ។
សូមបញ្ជាក់ថា កាលពីកន្លងទៅថ្មីៗនេះអាជ្ញាធរខ្មែរ បានធ្វើការបង្ក្រាប់ ក្រុមចាប់ជំរិត និងឧក្រិដ្ឋជនបរទេសបានជាច្រើននាក់ជាបន្តបន្ទាប់នៅទីក្រុងប៉ោយប៉ែត និងរាជធានីភ្នំពេញ ក្រោយពួកគេទាំងនោះបានចាប់បង្ខំយុវជន-យុវនារីថៃរាប់រយនាក់ឲ្យធ្វើការជាលក្ខណៈតេតាមទូរស័ព្ទ (CALL CENTER) បោកប្រាស់គេដើម្បីជំរិតទារប្រាក់គេជាដើមនោះ។
យ៉ាងណាក៏ដោយ លោកឧត្តមសេនីយ៍ឯក វីរៈឆ័យ ស៊ុមមេត្តា បានលើកឡើងថា ពេលនេះក្រុម យុវជន-យុវនារីទាំងនោះបានមកដល់ប្រទេសថៃវិញហើយ ហើយអាជ្ញាធរថៃនឹងបន្តសហការជានិច្ចមួយអាជ្ញាធរកម្ពុជា ក្នុងការបង្ក្រាបបទល្មើសបែបនេះ រួមទាំងជួយទប់ស្កាត់មេខ្យល់ដែលបោកពលរដ្ឋកម្ពុជាមកធ្វើការខុសច្បាប់នៅប្រទេសថៃផងដែរ។
នៅក្នុងកិច្ចចំនួបនោះលោក សុខ សុក្រឹត្យា លើកឡើងអំពីកិច្ចសហប្រតិបត្តិការទ្វេភាគីជា មួយថៃទាក់ទងនឹងការទប់ស្កាត់បទល្មើសនានា នៅតាមព្រំដែននៃប្រទេសទាំងពីរ ហើយលោកក៏បានស្នើភាគីថៃបន្តជំរុញកិច្ចសហប្រតិបត្តិការល្អក្នុងកិច្ចការប្រយុទ្ធប្រឆាំងព័ត៌មានក្លែងក្លាយ, ការបង្ក្រាបឧក្រិដ្ឋកម្មជួញដូរមនុស្ស, អនុញ្ញាតិភ្ជាប់Mobile App សុវត្ថិភាពពលករចំណាកស្រុកជាមួយប្រព័ន្ធប៉ូលីសថៃ និងការទប់ស្កាត់ក្រុមប្រឆាំង ដែលប្រើប្រាស់បណ្តាញសង្គមពីប្រទេសថៃ ដើម្បីធ្វើការវាយប្រហារមកលើថ្នាក់ដឹកនាំរាជរដ្ឋាភិបាលកម្ពុជាព្រមទាំងការប្រយុទ្ធប្រឆាំងឧក្រិដ្ឋកម្មជួញដូរគ្រឿងញៀន តាមព្រំដែនកម្ពុជា-ថៃដែរ។
ជាការឆ្លើយតប លោកឧត្តមសេនីយ៍ឯក វីរៈឆ័យ ស៊ុតមេត្តា បានបញ្ជាក់យ៉ាងច្បាស់ថា រាជរដ្ឋាភិបាលថៃ ក៏ដូចជាស្ថាប័នប៉ូលីសថៃ ដាច់ខាតមិនអោយក្រុមប្រឆាំងយកទឹកដីថៃជាទីតាំងធ្វើកម្មភាពនយោបាយប្រឆាំង និងរាជរដ្ឋាភិបាលប្រទេសណាមួយឡើយជាពិសេសគឺប្រទេសកម្ពុជានេះតែម្តង ហើយសមត្ថកិច្ចប៉ូលីសថៃគ្រប់លំដាប់ថ្នាក់ទាំងអស់នឹងបន្តកិច្ចសហប្រតិបត្តិការល្អ ជាមួយសមត្ថកិច្ចប៉ូលីសកម្ពុជាជានិច្ច ក្នុងការបង្ក្រាបរាល់បទល្មើសដែលបានរៀបរាប់ខាងលើនេះ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
