ក្រុមមន្រ្តីធនាគារកណ្ដាលរបស់សហរដ្ឋអាមេរិក បាននិយាយកាលពីថ្ងៃចន្ទ (១២ ឧសភា) ថា កិច្ចព្រមព្រៀងរវាងសហរដ្ឋអាមេរិក និងចិន ក្នុងការកាត់បន្ថយពន្ធនាំចូលដ៏កម្រោលបំផុតរវាងប្រទេសសេដ្ឋកិច្ចធំជាងគេទាំងពីររបស់ពិភពលោក អាចបន្ទាបផលប៉ះពាល់នៃសង្គ្រាមពាណិជ្ជកម្មលើសេដ្ឋកិច្ចសកល ទោះបីជាពន្ធសេសសល់នៅតែខ្ពស់ ហើយនឹងបន្សល់ទុកនូវស្នាមរបួសដល់សេដ្ឋកិច្ចក៏ដោយ។

មន្រ្តីជាន់ខ្ពស់នៃធនាគារកណ្តាល លោកស្រី Adriana Kugler បាននិយាយថា ការផ្អាក ៩០ថ្ងៃ លើការយកពន្ធនាំចូលរវាងគ្នា ក្នុងកម្រិតដែលគំរាមកំហែងបិទពាណិជ្ជកម្មទ្វេភាគី បានកាត់បន្ថយឱកាសដែលធនាគារកណ្តាលអាមេរិកនឹងត្រូវកាត់បន្ថយអត្រាការប្រាក់ ជាការឆ្លើយតបទៅនឹងការធ្លាក់ចុះនៃសេដ្ឋកិច្ចរបស់ប្រទេស។

លោកស្រី Kugler បន្តថា អត្រាពន្ធដែលឥឡូវនេះ អាមេរិកយក ៣០% លើការនាំចូលរបស់ចិន សម្រាប់ពេល ៩០ថ្ងៃបន្ទាប់ គឺនៅតែ "ខ្ពស់" ហើយលោកស្រីរំពឹងថា "ពិតជានៅតែមានការបង្កើនតម្លៃទំនិញ និងការធ្លាក់ចុះនៃសេដ្ឋកិច្ចរបស់ខ្លួន" ប៉ុន្តែយ៉ាងណាមិញ ផលប៉ះពាល់នៅតែតិចជាងមុន។

គួរឱ្យដឹងថា ចិន និងសហរដ្ឋអាមេរិក បានប្តេជ្ញាចាត់វិធានការបន្ធូរភាពតានតឹងពាណិជ្ជកម្ម ដោយបន្ទាបពន្ធរបស់អាមេរិក លើការនាំចូលចិន ដោយឥឡូវនេះនឹងកាត់មកត្រឹម ៣០% ប៉ុណ្ណោះពីតួលេខ ១៤៥%ពីមុន សម្រាប់ពេល ៩០ថ្ងៃ ខណៈពន្ធរបស់ចិន លើការនាំចូលអាមេរិក នឹងនៅត្រឹមតែ ១០% ពីតួលេខ ១២៥%ពីមុន សម្រាប់រយៈពេលដូចគ្នានេះ។ ធនាគារកណ្ដាលអាមេរិក កាលពីសប្តាហ៍មុន បានរក្សាអត្រាការប្រាក់គោលរបស់ខ្លួននៅក្នុងចន្លោះ ៤,២៥%-៤,៥០% ឱ្យនៅដដែល ហើយទំនងជាមិនផ្លាស់ប្តូរទេ រហូតទាល់តែរឿងដំឡើងពន្ធមានភាពច្បាស់លាស់៕