ទិន្នន័យចេញផ្សាយកាលពីថ្ងៃចន្ទ (១២ ឧសភា) សប្ដាហ៍នេះបានបង្ហាញថា តម្លៃរថយន្តថ្មីនៅក្នុងសហរដ្ឋអាមេរិក បានកើនឡើងខ្លាំងក្នុងខែមេសា ដែលជាសញ្ញាមួយបង្ហាញថាឥទ្ធិពលនៃវិធានការដំឡើងពន្ធរថយន្ត ២៥% របស់លោកប្រធានាធិបតី Donald Trump កំពុងវាយលុកពាសពេញទីផ្សាររថយន្ត។

សៀវភៅខៀវ Kelley របស់ស្ថាប័នរថយន្តពិភពលោក Cox Automotive បានបង្ហាញថា តម្លៃជាមធ្យមដែលអ្នកប្រើប្រាស់អាមេរិកបានបង់បន្ទាប់ពីការបញ្ចុះតម្លៃ និងការផ្សព្វផ្សាយ បានកើនឡើង ២,៥% ពីខែមីនា ច្រើនជាងទ្វេដងនៃកំណើន ១,១% តាមធម្មតា ក្នុងពេលពីរខែចុងក្រោយនេះ។ ក្នុងទស្សវត្សរ៍កន្លងមក ការកើនឡើងតម្លៃដ៏ធំបែបនេះគឺនៅក្នុងខែមេសា ឆ្នាំ២០២០ នៅពេលដែលតម្លៃរថយន្តហក់ឡើង ២,៧% កំឡុងពេលបិទរោងចក្រដោយសារជំងឺរាតត្បាតកូវីដ១៩។

ក្រុមហ៊ុនផលិតរថយន្តនានា កំពុងសម្របខ្លួននឹងពន្ធអាមេរិក ២៥% លើការនាំចូលរថយន្តពីប្រទេសជាច្រើន រួមទាំងដៃគូពាណិជ្ជកម្មសំខាន់ៗគឺម៉ិកស៊ិក និងកាណាដា ប៉ុន្តែមានតិចណាស់ដែលកែប្រែតម្លៃលក់។ ស្ថាប័នដូចជាក្រុមហ៊ុន Hyundai, Ford និងអ្នកផលិតរថយន្ត Jeep គឺ Stellantis បានចេញកិច្ចព្រមព្រៀងដើម្បីធានាដល់អ្នកទិញ ហើយនិងរក្សាតម្លៃរបស់ខ្លួន។

អ្នកចែកចាយ និងប្រតិបត្តិកររថយន្តនិយាយថា ទោះជាយ៉ាងនេះក្តី តម្រូវការរបស់អ្នកប្រើប្រាស់ បានកើនឡើងក្នុងប៉ុន្មានខែកន្លងមក ខណៈមនុស្សម្នាប្រញាប់ប្រញាល់ទិញរថយន្តដើម្បីទទួលបានតម្លៃល្អ មុនការឡើងថ្លៃដោយសារតែពន្ធ។ នោះមានន័យថា អ្នកទិញរថយន្តថ្មី ត្រូវចំណាយកាន់តែច្រើនជាងកម្រិតមធ្យមនៅតាមហាងចែកចាយ នេះបើយោងតាមរបាយការណ៍ Cox Automotive ដែលបន្ថែមថា ទោះជាក្រុមហ៊ុនរថយន្តរក្សាតម្លៃស្ថិរភាពក្តី ការរំពឹងទុករបស់អតិថិជនថាពន្ធនឹងបញ្ជូនតម្លៃឱ្យខ្ពស់ជាងមុន ទំនងជានាំឱ្យមានអតិផរណាលើម៉ូដែលជាក់លាក់ជាច្រើន៕