អ្នកឃ្លាំមើលភាពអត់ឃ្លានសកល បានព្រមានកាលពីថ្ងៃចន្ទ (១២ ឧសភា) ថា មនុស្សកន្លះលាននាក់នៅតំបន់ហ្កាហ្សាស្ទ្រីប ប្រឈមនឹងភាពអត់ឃ្លានធ្ងន់ធ្ងរបំផុត ដោយនិយាយថា តំបន់ដែលឡោមព័ទ្ធដោយអ៊ីស្រាអែលមួយនេះ នៅតែប្រឈមគ្រោះថ្នាក់ធ្ងន់ធ្ងរនៃគ្រោះទុរ្ភិក្ស ជាមួយនឹងហានិភ័យខ្ពស់បំផុតកើតឡើងនៅចុងខែកញ្ញា ខាងមុខ។

របាយការណ៍ថ្មីបំផុតរបស់អង្គការបែងចែកដំណាក់កាលសន្តិសុខស្បៀងរួម IPC បានលើកឡើងពីស្ថានភាពធ្ងន់ធ្ងរខ្លាំង ចាប់តាំងពីការធ្លាក់ចុះចុងក្រោយបង្អស់ក្នុងខែតុលា ដែលឆ្លុះបញ្ចាំងពីការព្រមានរបស់ទីភ្នាក់ងារអន្តរជាតិ អំពីគ្រោះមហន្តរាយដែលកំពុងកើតឡើងនៅក្នុងទឹកដីប៉ាឡេស្ទីនដ៏តូចចង្អៀត និងមានប្រជាជនរស់នៅច្រើនកុះករមួយនេះ។

IPC បានព្យាករថា មនុស្ស ២,១លាននាក់នៅទូទាំងតំបន់ហ្កាហ្សា ពោលគឺប្រហែលចំនួនប្រជាជនទាំងមូល ទំនងជានឹងជួបប្រទះនូវកម្រិតអសន្តិសុខស្បៀងធ្ងន់ធ្ងរនៅចុងខែកញ្ញា ដោយមនុស្ស ៤៦៩.៥០០នាក់ ក្នុងចំណោមតួលេខសរុប ត្រូវព្យាករថានឹងឈានដល់កម្រិត "មហន្តរាយ" បើសិនផ្លូវជំនួយនៅតែបិទ។

គួរឱ្យដឹងថា អ៊ីស្រាអែល បានបិទច្រកចូលទៅកាន់តំបន់ហ្កាហ្សាស្រ្ទីប តាំងពីដើមខែមីនាមក នៅពេលដែលខ្លួនបន្តយុទ្ធនាការយោធាដ៏បំផ្លិចបំផ្លាញប្រឆាំងនឹងក្រុមសកម្មប្រយុទ្ធហាម៉ាស បន្ទាប់ពីការដួលរលំនៃកិច្ចព្រមព្រៀងបទឈប់បាញ់ ដោយបានរារាំងរថយន្តជំនួយមិនឱ្យចូលទៅកាន់ដែនដីនេះ៕