កុមារម៉ិកស៊ិកជាច្រើននាក់ បានចេញតវ៉ាតាមដងផ្លូវកាលពីថ្ងៃចន្ទ (១២ ឧសភា) ទាមទារឱ្យមានសន្តិភាព និងយុត្តិធម៌ បន្ទាប់ពីការសម្លាប់ក្មេងស្រីអនីតិជន ២នាក់នៅក្នុងរដ្ឋ Sinaloa ដែលញាំញីដោយអំពើហិង្សា ជាទីដែលជម្លោះផ្ទៃក្នុងរបស់ក្រុមជួញដូរគ្រឿងញៀន កំពុងបន្តកើនឡើងយ៉ាងអាក្រក់ក្នុងប៉ុន្មានខែថ្មីៗ។

បាតុកម្មនេះបានកើតឡើងនៅសាលាបឋមសិក្សា Rafael Ramirez ក្នុងរដ្ឋធានីនៃរដ្ឋ Culiacan ជាទីដែលសាច់ញាតិ មិត្តរួមថ្នាក់ និងគ្រូបង្រៀន បានប្រមូលផ្តុំគ្នាកាន់ទុក្ខចំពោះការស្លាប់របស់ក្មេងស្រីឈ្មោះ Alexa Medina អាយុ ៧ឆ្នាំ និង Leidy Rojas អាយុ ១១ឆ្នាំ។ កុមារីទាំងនោះត្រូវបានសម្លាប់កាលពីថ្ងៃទី០៦ ខែឧសភា ក្នុងពេលធ្វើដំណើរជាមួយសមាជិកគ្រួសារនៅជិតក្រុង Badiraguato។

កុមារដែលចូលរួមបាតុកម្មនោះបានសម្ដែងកង្វល់របស់ខ្លួនថា ពួកគេចង់បានសន្តិភាព បន្ទាប់ពីប្រឈមមុខនឹងអំពើហិង្សាអស់ច្រើនខែដោយពុំមានដំណោះស្រាយ ហើយសង្គមហាក់មិនអើពើនឹងរឿងនេះឡើយ ដោយអំពាវនាវឱ្យអាជ្ញាធរចាត់វិធានការបន្ទាន់នាំយកសន្តិសុខដល់រដ្ឋ។

សាច់ញាតិបានប្រាប់ឱ្យដឹងថា រថយន្តដែលដឹកកុមារីរងគ្រោះបានរងការបាញ់ប្រហារពីអង្គភាពយោធា។ របាយការណ៍ដំបូងបានបង្ហាញថា ក្មេងស្រីទាំងនោះបានជាប់ខ្លួនក្នុងការបាញ់ប្រហារមួយ ប៉ុន្តែអភិបាលរដ្ឋ Sinaloa បានប្រកែកថា មិនមែនបែបនោះទេ ហើយសន្យាថានឹងបើកការស៊ើបអង្កេតពេញលេញរកមូលហេតុពិប្រាកដ៕