រដ្ឋាភិបាលហូឡង់ និងអូស្ត្រាលី បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា ក្រុមប្រឹក្សាអាកាសចរណ៍ របស់អង្គការសហប្រជាជាតិ កាលពីថ្ងៃចន្ទ (១២ ឧសភា) បានចេញសេចក្ដីសម្រេចថា រុស្ស៊ី ជាអ្នកទទួលខុសត្រូវចំពោះការបាញ់ទម្លាក់យន្តហោះម៉ាឡេស៊ីមួយគ្រឿងនៅលើទឹកដីអ៊ុយក្រែន ដែលបានសម្លាប់អ្នកដំណើរ និងបុគ្គលិកទាំងអស់ ២៩៨នាក់ រួមទាំងពលរដ្ឋហូឡង់ ១៩៦នាក់ និងពលរដ្ឋអូស្ត្រាលី ៣៨នាក់។

រដ្ឋាភិបាលទាំងពីរនិយាយថា នៅប៉ុន្មានសប្តាហ៍ខាងមុខនេះ ក្រុមប្រឹក្សានៃអង្គការអាកាសចរណ៍ស៊ីវិលអន្តរជាតិ (ICAO) នឹងពិចារណាថា តើទម្រង់នៃសំណងបែបណាដែលស្ថិតក្នុងសេចក្ដីសម្រេចនោះ។

គួរម្លឹកថា ជើងហោះហើរ MH17 របស់ក្រុមហ៊ុនអាកាសចរណ៍ម៉ាឡេស៊ី បានចាកចេញពីទីក្រុងអាំស្ទែដាំ ទៅកាន់ទីក្រុង Kuala Lumpur កាលពីថ្ងៃទី១៧ ខែកក្កដា ឆ្នាំ២០១៤ ហើយត្រូវបានបាញ់ទម្លាក់នៅភាគខាងកើតអ៊ុយក្រែន ខណៈការប្រយុទ្ធគ្នាបានកើតឡើងរវាងក្រុមផ្តាច់ខ្លួនគាំទ្ររុស្ស៊ី ទល់នឹងកងកម្លាំងអ៊ុយក្រែន។

នៅខែវិច្ឆិកា ឆ្នាំ២០២២ ចៅក្រមហូឡង់ បានកាត់ទោសបុរសរុស្ស៊ីពីរនាក់ និងបុរសអ៊ុយក្រែនម្នាក់ ដោយកំបាំងមុខ ពីបទមនុស្សឃាតសម្រាប់តួនាទីរបស់ពួកគេក្នុងការវាយប្រហារនោះ។ ទីក្រុងមូស្គូ បានហៅសេចក្តីសម្រេចនេះថា "ជារឿងដ៏អាម៉ាស" ហើយនិយាយថា ខ្លួននឹងមិនធ្វើបត្យាប័នពលរដ្ឋរបស់ខ្លួនឡើយ។

រដ្ឋមន្ត្រីការបរទេសហូឡង់ បាននិយាយថា "សេចក្ដីសម្រេចនេះគឺជាជំហានដ៏សំខាន់មួយឆ្ពោះទៅរកការបង្កើតការពិត និងសម្រេចបាននូវយុត្តិធម៌សម្រាប់ជនរងគ្រោះទាំងអស់នៃជើងហោះហើរ MH17 និងក្រុមគ្រួសារពួកគេ"។ រដ្ឋមន្ត្រីការបរទេសអូស្ត្រាលី រដ្ឋាភិបាលអូស្ត្រាលីស្វាគមន៍ការសម្រេចនេះ ហើយបានជំរុញឱ្យស្ថាប័ន ICAO ចាត់វិធានការយ៉ាងឆាប់រហ័សដើម្បីកំណត់ដំណោះស្រាយ៕