យោធាមីយ៉ាន់ម៉ា បានវាយប្រហារតាមអាកាសទៅលើសាលារៀនមួយកន្លែង ដំណើរការដោយកងកម្លាំងគាំទ្រលទ្ធិប្រជាធិបតេយ្យ។ ការវាយប្រហារនេះ បានបណ្តាលឲ្យកុមារយ៉ាងហោចណាស់២០នាក់ស្លាប់។ ប្រព័ន្ធផ្សព្វផ្សាយឯករាជ្យមួយក្នុងសហភាពមីយ៉ាន់ម៉ា និយាយថា ការវាយប្រហារកាលពីថ្ងៃច័ន្ទ បានដាក់គោលដៅទៅលើសាលារៀនមួយកន្លែងនៅតំបន់ Sagaing ភាគពាយ័ព្យ។

របាយការណ៍និយាយថា យ៉ាងហោចណាស់កុមារ២០នាក់ និងគ្រូ២នាក់ បានស្លាប់។ របាយការណ៍ក៏និយាយផងដែរថា មនុស្សជាង៥០នាក់ផ្សេងទៀតបានរងរបួស។ សាលារៀននេះ ត្រូវបានគ្រប់គ្រងដោយរដ្ឋាភិបាលរួបរួមជាតិ ត្រូវបានបង្កើតឡើងដោយកងកម្លាំងគាំទ្រលទ្ធិប្រជាធិបតេយ្យ។ កុមារ និងក្មេងជំទង់គ្រប់វ័យ បានចូលរៀននៅសាលារៀននេះ។

មន្ត្រីម្នាក់មកពីជំរំគាំទ្រលទ្ធិប្រជាធិបតេយ្យបានប្រាប់ប្រព័ន្ធផ្សព្វផ្សាយ NHK ថា ចំនួនអ្នកស្លាប់និងរបួសទំនងជាកើនឡើង ខណៈមនុស្សមួយចំនួននៅបាត់ខ្លួន។ មន្ត្រីរូបនេះ បានថ្កោលទោសយ៉ាងខ្លាំងចំពោះការឆ្លើយតបរបស់យោធា។ ប្រព័ន្ធផ្សព្វផ្សាយរដ្ឋបានដកស្រង់សំដីយោធា ដែលបាននិយាយថា «គ្មានការវាយប្រហារបំផ្ទុះគ្រាប់បែកបែបនេះទេ»។ យោធាបានអះអាងថា «ប្រព័ន្ធផ្សព្វផ្សាយប្រឆាំងរដ្ឋាភិបាលខុសច្បាប់ បានផ្សព្វផ្សាយព័ត៌មានមិនពិត»។

យោធាបានរក្សាការគ្រប់គ្រងសហភាពមីយ៉ាន់ម៉ា ចាប់តាំងពីខ្លួនបានធ្វើរដ្ឋប្រហារកាលពីបួនឆ្នាំមុន។ យោធាបានប្រកាសបទឈប់បាញ់បណ្តោះអាសន្ននៅក្នុងការប្រយុទ្ធរបស់ខ្លួនប្រឆាំងកងកម្លាំងគាំទ្រលទ្ធិប្រជាធិបតេយ្យ បន្ទាប់ពីការរញ្ជួយដីដ៏ធំដែលបានវាយប្រហារសហភាពនេះ កាលពីខែមីនា។ ក្រោយមកយោធាបានប្រកាសថា បទឈប់បាញ់នឹងត្រូវបន្ថែមពេលរហូតដល់ថ្ងៃទី៣១ ខែឧសភា។ ប៉ុន្តែការវាយប្រហារតាមអាកាស និងការវាយប្រហារដោយកាំភ្លើងធំធ្វើឡើងដោយយោធា តាមសេចក្តីរាយការណ៍ថា នៅតែបន្តក្នុងតំបន់នានាដែលរងផលប៉ះពាល់ដោយការរញ្ជួយដី និងនៅកន្លែងផ្សេងទៀត។