ប្រធានាធិបតីចិន លោក Xi Jinping បានរិះគន់ខ្លាំងៗលើ "ការគំរាមកំហែង" និង "អនុត្តរភាព" នៅក្នុងសុន្ទរកថាសាធារណៈលើកដំបូងរបស់លោក ចាប់តាំងពីកិច្ចព្រមព្រៀងកាត់បន្ថយអត្រាពន្ធបណ្តោះអាសន្ន បានធ្វើឡើងដើម្បីទម្លាយភាពជាប់គាំងក្នុងសង្គ្រាមពាណិជ្ជកម្មរវាងសហរដ្ឋអាមេរិក និងចិន។

លោក Xi បានថ្លែងប្រាប់ក្រុមមន្ត្រីអាមេរិកឡាទីន និងតំបន់ការ៉ាអ៊ីប ដែលបានប្រមូលផ្តុំគ្នានៅទីក្រុងប៉េកាំង សម្រាប់កិច្ចប្រជុំកំពូលនាថ្ងៃអង្គារ (១៣ ឧសភា) នេះថា ការផ្លាស់ប្តូរធំៗដែលមិនធ្លាប់ឃើញក្នុងពេលមួយសតវត្សរ៍មកនេះ កំពុងតែបង្កើនល្បឿន ដែល "បានធ្វើឱ្យការឯកភាព និងកិច្ចសហប្រតិបត្តិការក្នុងចំណោមប្រជាជាតិ មិនអាចខ្វះបាន"។

លោកបានលើកឡើងថា "មិនមានអ្នកឈ្នះក្នុងសង្គ្រាមពន្ធ ឬសង្រ្គាមពាណិជ្ជកម្មទេ។ ការគំរាមកំហែង ឬអនុត្តរភាព នាំមកនូវភាពឯកោសម្រាប់ខ្លួនឯងតែប៉ុណ្ណោះ" ដោយបានរំលឹកឡើងវិញជាថ្មីនូវការព្រមាន ដែលលោកបានធ្វើឡើងអំឡុងពេលតានតឹងខ្លាំងនៃសង្រ្គាមពាណិជ្ជកម្ម ជាមួយលោកប្រធានាធិបតីអាមេរិក Donald Trump។

សុន្ទរកថារបស់លោក Xi ធ្វើឡើងរយៈពេលមួយថ្ងៃប៉ុណ្ណោះ បន្ទាប់ពីអាមេរិក និងចិន បានប្រកាសថា ភាគីទាំងពីរនឹងទម្លាក់ពន្ធក្នុងតួលេខដ៏ច្រើនលើទំនិញរបស់គ្នាទៅវិញទៅមកនៅរយៈពេល ៩០ថ្ងៃដំបូង នៅក្នុងវឌ្ឍនភាពដ៏គួរឱ្យភ្ញាក់ផ្អើលមួយ ដែលបានបន្ថយភាពតានតឹងនៃសង្គ្រាមពាណិជ្ជកម្ម និងជំរុញកំណើនទីផ្សារពិភពលោក។

កិច្ចព្រមព្រៀងដ៏គួរឱ្យភ្ញាក់ផ្អើលនេះ បានផ្តល់នូវការបន្ធូរបន្ថយជាបណ្តោះអាសន្នក្នុងសង្គ្រាមពន្ធដារ ដែលបានធ្វើឱ្យទីផ្សារហិរញ្ញវត្ថុរង្គោះរង្គើ គំរាមកំហែងកាត់ផ្តាច់ពាណិជ្ជកម្មរវាងប្រទេសសេដ្ឋកិច្ចធំជាងគេទាំងពីរ និងបង្កឱ្យមានការភ័យខ្លាចនៃវិបត្តិសេដ្ឋកិច្ចសកល៕