អនុរដ្ឋមន្ត្រីការបរទេសរុស្ស៊ី លោក Alexander Grushko បានប្រាប់សារព័ត៌មាន TASS កាលពីថ្ងៃចន្ទ (១២ ឧសភា) ថា រុស្ស៊ីទំនងជានឹងបិទការិយាល័យអគ្គកុងស៊ុលប៉ូឡូញ នៅទីក្រុង Kaliningrad ចុងភាគខាងលិចរបស់ប្រទេស និងនៅទីក្រុង Irkutsk ភាគខាងកើតតំបន់ស៊ីបេរី ដើម្បីឆ្លើយតបទៅនឹងជំហានប្រឆាំងរុស្ស៊ី នាពេលថ្មីៗនេះរបស់រដ្ឋធានីវ៉ាសូវី។ 

នៅពេលត្រូវសាកសួរថា តើរុស្ស៊ី នឹងបិទបេសកកម្មប៉ូឡូញឬទេ លោក Grushko បានឆ្លើយថា "អាចទៅរួច ព្រោះទីក្រុងមូស្គូ ប្រាកដជានឹងសងសឹក"។ ការអត្ថាធិប្បាយនេះកើតឡើងបន្ទាប់ពីរដ្ឋមន្ត្រីការបរទេសប៉ូឡូញ Radoslaw Sikorski បានសម្រេចបិទការិយាល័យអគ្គកុងស៊ុលរុស្ស៊ី នៅទីក្រុង Krakow។

ភាពតានតឹងទាំងនេះបណ្ដាលមកពីអគ្គិភ័យដ៏ធំមួយ ដែលឆាបផ្សារទំនើបមួយកន្លែងនៅផ្លូវ Marywilska នៅភាគខាងជើងនៃទីក្រុងវ៉ាសូវី របស់ប៉ូឡូញ កាលពីព្រឹកព្រលឹមថ្ងៃទី១២ ខែឧសភា ឆ្នាំ២០២៤។ ក្រោយមកអាជ្ញាធរប៉ូឡូញ បានអះអាងថា "សេវាពិសេសរបស់រុស្ស៊ី" គឺជាអ្នកនៅពីក្រោយឧប្បត្តិហេតុនេះ។

ឆ្លើយតបនឹងទង្វើនេះ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយថា “ទីក្រុងវ៉ាសូវី នៅតែមានចេតនាបន្តបំផ្លាញទំនាក់ទំនង ដោយធ្វើសកម្មភាពប្រឆាំងនឹងផលប្រយោជន៍របស់រុស្ស៊ី"។ ឯកអគ្គរដ្ឋទូតរុស្ស៊ី ប្រចាំនៅទីក្រុងវ៉ាសូវី លោក Sergey Andreyev ក៏លើកឡើងថា អាជ្ញាធរប៉ូឡូញ មិនទាន់បង្ហាញភស្តុតាងណាមួយដើម្បីបញ្ជាក់ការអះអាងនេះនៅឡើយទេ៕