​អាមេរិក៖ ប្រធានាធិបតី​សហរដ្ឋអាមេរិក​លោក Joe Biden បាន​និយាយ​កាលពី​ថ្ងៃ​ចន្ទ​ថា លោកនឹង​ធ្វើ​ដំណើរ​ទៅកាន់​រដ្ឋ Kentucky នៅ​ថ្ងៃ​ពុធ ដើម្បី​ពិនិត្យមើល​ការខូចខាត​ពី​ព្យុះ​កំណាច​ថូ​ណា​ដូកាលពី​សប្តាហ៍​មុន ​បណ្ដាល​ឲ្យ​មនុស្ស​យ៉ាងហោចណាស់ ៨៨នាក់​ស្លាប់ ៧៤​នាក់ក្នុងរដ្ឋ Kentucky និង​មនុស្ស​រាប់​ពាន់​នាក់​ទៀត​ត្រូវ​បាន​ជម្លៀស​ចេញ​។

លោក Biden បាន​ប្រកាស​អំពី​ដំណើរ​ចុះ​ពិនិត្យ​នា​ពេល​ខាង​មុខ បន្ទាប់ពី​សន្និសីទ​ជាមួយ​មន្ត្រី​សន្តិសុខ​ និង​ឆ្លើយតប​គ្រោះមហន្តរាយ​នៅការិយាល័យ Oval Office ដើម្បី​ពិភាក្សា​អំពី​អ្វីដែល​រដ្ឋាភិបាល​ស​ហ​ព័ន្ធ​អាចធ្វើ​បន្ថែមទៀត ក្នុងការ​គាំទ្រ​អ្នក​ដែល​រង​ផល​ប៉ះពាល់​ដោយគ្រោះមហន្តរាយធម្មជាតិ​។ សេត​វិមាន​បាន​និយាយថា លោក Biden នឹងធ្វើ​ដំណើរទៅកាន់​មូលដ្ឋាន Fort. Campbell រដ្ឋ Kentucky ហើយ​​បន្ទាប់មក​ទៅកាន់​ទីក្រុង Mayfield និង Dawson Springs ដែល​រងគ្រោះ​ខ្លាំងដើម្បី​ពិនិត្យមើល​ការខូចខាត​។​ ​អ្នកនាំពាក្យ​សេត​វិមាន​លោកស្រី Jen Psaki បាន​និយាយ​កាលពី​ថ្ងៃ​ចន្ទ​ថា ប្រធានាធិបតីលោក Joe Biden មិនត្រូវ​បាន​គេ​រំពឹងថា​នឹង​ថ្លែង​សុន្ទរកថា​នៅ​ពេល​លោក​ចុះ​ពិ​និត្យនៅ​រដ្ឋ Kentucky នោះទេ ប៉ុន្តែ​លោក​នឹង​ផ្តោតលើ​ការជួប​ជាមួយ​ក្រុមមន្ត្រី​ក្នុង​តំបន់ និងព្យាយាម​ធ្វើជា​ប្រភព​នៃ​ការលួង​ចិត្តដល់​ពលរដ្ឋ​ដែល​បាន​ឆ្លងកាត់​ព្យុះ​ ដែល​បាន​បំផ្លាញ​ធ្ងន់ធ្ងរនៅក្នុង​សហគមន៍​របស់​ពួកគេ​។

​លោក ​Biden បាន​និយាយថា ​រដ្ឋបាល​របស់លោក​កំពុងធ្វើការ ​ដើម្បី​ជួយ​ប្រជាជន​ឱ្យមានភាព​ស្ងប់​ក្នុង​ចិត្ត​។ លោក Biden និយាយថា លោក​មិនអាច​និយាយ​ដោយ​ភាពប្រាកដប្រជា​ថា ព្យុះ​នេះ​គឺជា​លទ្ធផល​នៃ​បម្រែបម្រួល​អាកាសធាតុ​នោះទេ ប៉ុន្តែ​លោក​និយាយថា លោក​នឹង​និយាយ​ទៅកាន់​ទីភ្នាក់ងារ​ការពា​រ​បរិស្ថាន និង​ទីភ្នាក់ងារ​ផ្សេងទៀត​ដើម្បី​កំណត់ថា​ តើ​វា​ជា​ករណី​ដូច​ម្តេ​ច​?

អត្ថបទ៖ ប៊ុនថន