នាយករដ្ឋមន្ត្រីប៉ាគីស្ថាន លោក Muhammad Shehbaz Sharif នៅថ្ងៃអង្គារ (១៣ ឧសភា) នេះ បាននិយាយថា ការវាយលុករបស់ប្រទេសលោក ប្រឆាំងនឹងឥណ្ឌា គឺជា «ជោគជ័យដ៏ធំអស្ចារ្យ» ដោយប្រកាសថា សមិទ្ធិផលនេះត្រូវបានប្រារព្ធនៅថ្ងៃទី១០ ខែឧសភាជារៀងរាល់ឆ្នាំ។

ថ្ងៃទី១០ ខែឧសភា គឺជាពេលដែលកិច្ចព្រមព្រៀងឈប់បាញ់ រវាងប្រទេសជិតខាងទាំង២ ពោលគឺប៉ុន្មានម៉ោងបន្ទាប់ពីប៉ាគីស្ថានបានបើកប្រតិបត្តិការយោធាប្រឆាំងនឹងឥណ្ឌា ដែលប្រទេសនេះបាននិយាយថា បានកំណត់គោលដៅលើកន្លែងផ្ទុកមីស៊ីលឥណ្ឌា និងមូលដ្ឋានទ័ពអាកាស។

តាមរយៈបណ្ដាញសង្គម X រដ្ឋាភិបាលបានលើកឡើងថា៖ «ទិវាតស៊ូ ដើម្បីការពិត នឹងប្រារព្ធជារៀងរាល់ឆ្នាំនៅទូទាំងប្រទេស ប្រកបដោយសេចក្ដីសាទរ និងស្មារតីឯកភាពជាតិ»។

បទឈប់បាញ់ទំនងជាចូលជាធរមាន នៅថ្ងៃអង្គារ បន្ទាប់ពីរយៈពេល ៤ថ្ងៃនៃការវាយប្រហារដោយយន្តហោះចម្បាំង មីស៊ីល យានដ្រូន និងកាំភ្លើងធំ ដែលជាអំពើហិង្សាដ៏អាក្រក់បំផុត រវាងប្រទេសជិតខាងប្រដាប់អាវុធនុយក្លេអ៊ែរទាំង២ ចាប់តាំងពីឆ្នាំ១៩៩៩ មក។

ជម្លោះបានកើតឡើងបន្ទាប់ពីការវាយប្រហារកាលថ្ងៃទី២២ ខែមេសា លើអ្នកទេសចរ នៅតំបន់កាស្មៀរគ្រប់គ្រងដោយឥណ្ឌា ដែលបានសម្លាប់ជនស៊ីវិល ២៦នាក់។ ឥណ្ឌាបានចោទប៉ាគីស្ថានថា បានគាំទ្រការវាយប្រហារនេះ ប៉ុន្តែក្រុងអ៊ីស្លាម៉ាបាដបានបដិសេធថា មិនជាប់ពាក់ព័ន្ធឡើយ៕