សហរដ្ឋអាមេរិកបានប្រកាសដាក់ទណ្ឌកម្មថ្មីប្រឆាំងនឹងអ៊ីរ៉ង់ កាលពីថ្ងៃចន្ទ (ទី១២ ខែឧសភា) ពាក់ព័ន្ធនឹងកម្មវិធីនុយក្លេអ៊ែររបស់ទីក្រុងតេអេរ៉ង់ ទោះបីជាការចរចារ រវាងប្រទេសទាំង២ អំពីបញ្ហារសើបនេះ កំពុងដំណើរការក៏ដោយ។

ការដាក់ទណ្ឌកម្មចុងក្រោយបង្អស់បានកំណត់គោលដៅទៅលើពលរដ្ឋអ៊ីរ៉ង់ ៣នាក់ និងអង្គភាពរបស់អ៊ីរ៉ង់ដែលមានទំនាក់ទំនងជាមួយអង្គកានវានុវត្តន៍ និងការស្រាវជ្រាវផ្នែកការពារជាតិរបស់ទីក្រុងតេអេរ៉ង់ ដែលត្រូវបានគេស្គាល់ដោយអក្សរកាត់ SPND។

រដ្ឋមន្ត្រីការបរទេស លោក Marco Rubio បានឲ្យដឹងនៅក្នុងសេចក្តីថ្លែងការណ៍មួយថា៖ «អ៊ីរ៉ង់បន្តពង្រីកយ៉ាងខ្លាំងក្លានូវកម្មវិធីនុយក្លេអ៊ែររបស់ខ្លួន ហើយអនុវត្តសកម្មភាពស្រាវជ្រាវ និងអភិវឌ្ឍន៍ការប្រើប្រាស់បានទាំងយោធា និងស៊ីវិល ពោលគឺជាការស្រាវជ្រាវដែលអាចមានលទ្ធភាពផលិតអាវុធនុយក្លេអ៊ែរ និងប្រព័ន្ធចែកចាយអាវុធនុយក្លេអ៊ែរ»។

លោក Rubio បានបញ្ជាក់បន្ថែមថា អ៊ីរ៉ង់ជាប្រទេសតែមួយគត់ ក្នុងពិភពលោក គ្មានអាវុធនុយក្លេអ៊ែរដែលចម្រាញ់សារធាតុអ៊ុយរ៉ាញ៉ូមដល់ទៅ ៦០ភាគរយ។

កម្រិតនោះលើសពីកម្រិតអតិបរមា ៣,៦៧ភាគរយដែលត្រូវបានកំណត់ក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ដែលប្រធានាធិបតីអាមេរិក លោក Donald Trump បានចាកចេញអំឡុងអាណត្តិដំបូងរបស់លោក។ ការបង្កើតអាវុធនុយក្លេអ៊ែរទាមទារឲ្យមានការចម្រាញ់ ៩០ភាគរយ។

សហរដ្ឋអាមេរិកបានប្រកាសពីទណ្ឌកម្មថ្មី មួយថ្ងៃបន្ទាប់ពីការចរចាជុំទី៤ ជាមួយអ៊ីរ៉ង់ បានបញ្ចប់។ គ្មានការទម្លាយភាពទាល់ច្រកសំខាន់ណាមួយត្រូវបានប្រកាសនោះឡើយ ក្រោយកិច្ចចរចានោះ តែភាគីទាំង២ សុទ្ធតែបានសម្តែងសុទិដ្ឋិនិយមយ៉ាងប្រុងប្រយ័ត្នដូចគ្នា៕