នរគបាលអង់គ្លេសកំពុងស៊ើបអង្កេតករណីអគ្គិភ័យនាពេលយប់ដែលបានឆាបឆេះគេហដ្ឋានរបស់នាយករដ្ឋមន្ត្រី លោក Keir Starmer នៅភាគខាងជើងទីក្រុងឡុងដ្រ៍ ជាហេតុកាណ៍ដែលគ្មាននរណាម្នាក់រងរបួសឡើយ។

អ្នកនាំពាក្យការិយាល័យវិមាន Downing Street របស់លោក Starmer បាននិយាយកាលពីថ្ងៃចន្ទ (១២ ឧសភា) ថា៖ «លោកនាយករដ្ឋមន្ត្រីសូមអរគុណដល់សេវាសង្គ្រោះបន្ទាន់ សម្រាប់ការបំពេញការងាររបស់ពួកគេបានយ៉ាងល្អ។ ឧបទ្ទវហេតុនេះ គឺស្ថិតនៅក្រោមការស៊ើបអង្កេត ហើយដូច្នេះ យើងនឹងមិនធ្វើអត្ថាធិប្បាយអ្វីបន្ថែមឡើយ»។

នៅក្នុងសេចក្តីថ្លែងការណ៍មួយ ដោយមិនសំដៅដល់មេដឹកនាំអង់គ្លេស នគរបាលបានប្រាប់ឲ្យដឹងថា ពួកគេទទួលបានទូរសព្ទរាយការណ៍ អំពីអគ្គិភ័យនេះ នៅម៉ោងប្រហែល ១:៣៥ ម៉ោងក្នុងស្រុក (ត្រូវនឹងម៉ោង ០០:៣៥ ម៉ោងសកល)។

នគរបាលទីក្រុងឡុងដ្រ៍ បានប្រាប់ថា «មន្រ្តីបានទៅដល់កន្លែងកើតហេតុ។ ការខូចខាតត្រូវបានរាលដល់ដល់ច្រកចូលនៃអចលទ្រព្យនេះ តែមិនមាននរណាម្នាក់រងរបួសទេ។ អគ្គិភ័យកំពុងត្រូវបានស៊ើបអង្កេត ហើយការហ៊ុមព័ទ្ធបិទមិនឲ្យចូលនៅមាននៅឡើយ ខណៈការស៊ើបអង្កេតកំពុងបន្តធ្វើ»។ 

គួរបញ្ជាក់ថា លោក Starmer ដែលមានគេហដ្ឋាននៅភាគខាងជើងទីក្រុងឡុងដ្រ៍ បានស្នាក់នៅឯការិយាល័យវិមាន Downing Street និងនិវេសនដ្ឋានរបស់លោក ចាប់តាំងពីបានក្លាយជានាយករដ្ឋមន្ត្រីកាលពីខែកក្កដាឆ្នាំមុន៕