លោក Stéphane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ បាននិយាយថា គំនិតផ្តួចផ្តើមថ្មីៗស្តីពីបទឈប់បាញ់នៅអ៊ុយក្រែន និងកិច្ចចរចាផ្ទាល់ដ៏មានសក្តានុពលរវាងទីក្រុងមូស្គូ និងទីក្រុងគីវ មើលទៅមានការលើកទឹកចិត្ត។

លោកបាននិយាយថា៖«យើងនៅតែព្យាយាម ដើម្បីទទួលបានព័ត៌មានលម្អិតបន្ថែមទៀតអំពីអ្វីដែលអាចនឹងកើតឡើង ប៉ុន្តែខ្ញុំអាចប្រាប់អ្នកថា យើងពិតជាត្រូវបានលើកទឹកចិត្តដោយគំនិតផ្តួចផ្តើមថ្មីៗ ដែលកំពុងជំរុញឲ្យមានបទឈប់បាញ់រយៈពេល ៣០ថ្ងៃ នៅអ៊ុយក្រែន និងកិច្ចពិភាក្សាផ្ទាល់ដែលមានសក្តានុពលរវាងសហព័ន្ធរុស្ស៊ី និងអ៊ុយក្រែន»។

យោងតាមលោក Dujarric បានឲ្យដឹងថា អង្គការសហប្រជាជាតិ បានត្រៀមខ្លួនជាស្រេចដើម្បី «គាំទ្ររាល់គំនិតផ្តួចផ្តើមដ៏មានអត្ថន័យដល់ទីបញ្ចប់»។

នៅពេលត្រូវបានសួរថាតើអគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស ( Antonio Guterres) ដែលបច្ចុប្បន្នកំពុងបំពេញទស្សនកិច្ចនៅអឺរ៉ុប អាចធ្វើដំណើរទៅទីក្រុងអ៊ីស្តង់ប៊ុលនៃប្រទេសទួរគី នៅថ្ងៃព្រហស្បតិ៍ ជាទីដែលតំណាងរុស្ស៊ីនិងអ៊ុយក្រែន ត្រូវបានគេរំពឹងថា នឹងជួបនោះ លោកបាននិយាយថាប្រធានអង្គការសហប្រជាជាតិ កំពុងដោះស្រាយបញ្ហាជាច្រើន ហើយបានស្នើថា គួរតែរង់ចាំមើលថាតើមានអ្វីកើតឡើង។

ថ្លែងទៅកាន់អ្នកសារព័ត៌មាននៅវិមានក្រឹមឡាំង នាថ្ងៃទី ១១ ខែឧសភា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានអញ្ជើញអាជ្ញាធរទីក្រុងគីវ ឲ្យបន្តកិច្ចចរចាផ្ទាល់ ដែលពួកគេបានបញ្ចប់នៅឆ្នាំ ២០២២ ដោយគ្មានលក្ខខណ្ឌបឋមណាមួយឡើយ។ លោកបានស្នើឲ្យបើកកិច្ចពិភាក្សាមួយ នៅថ្ងៃទី១៥ ខែឧសភា នៅក្រុងអ៊ីស្តង់ប៊ុល។ មេដឹកនាំរុស្ស៊ីរូបនេះ បានរំលឹកថា រុស្ស៊ីបានប្រកាសបទឈប់បាញ់លើស ពីម្តង ប៉ុន្តែពួកគេទាំងអស់ រួមទាំងបទឈប់បាញ់ V-Day បីថ្ងៃចុងក្រោយ ត្រូវបានរំលោភដោយរបបទីក្រុងគីវ។