ខណៈដែលឥណ្ឌា និងប៉ាគីស្ថាន បន្តបទឈប់បាញ់គ្នា បន្ទាប់ពីមានការប៉ះទង្គិចគ្នាដោយយោធារយៈពេល ៤ថ្ងៃ ប្រជាជននៅក្នុងភូមិព្រំដែន ក្នុងតំបន់កាស្មៀរ ( Kashmir) ដែលគ្រប់គ្រងដោយឥណ្ឌា បាននិយាយកាលពីថ្ងៃចន្ទ (ទី ១២ ខែឧសភ) ថា ពួកគេ «ចង់បានយុត្តិធម៌» សម្រាប់ការខូចខាត។

លោក Joginder Lal អ្នកភូមិមកពីភូមិព្រំដែន Pahari Wala ក្នុងតំបន់កាស្មៀរគ្រប់គ្រងដោយឥណ្ឌាបាននិយាយថា៖«យើងចង់សងសឹកប៉ាគីស្ថានឲ្យពេញទំហឹង»។

អ្នកស្រី Roshan Lal មកពីភូមិ Kot Maira ដែលជាភូមិព្រំដែនមួយផ្សេងទៀតនៅតំបន់កាស្មៀរគ្រប់គ្រងដោយឥណ្ឌា បាននិយាយថា៖«ផ្ទះរបស់ខ្ញុំទាំងមូល ត្រូវបានខូចខាត ហើយខ្ញុំគ្រាន់តែចង់ប្រាប់រដ្ឋាភិបាល របស់លោក Modi ថា យើងចង់បានយុត្តិធម៌»។ ស្ត្រីវ័យ ៤៧ឆ្នាំ រូបនេះ បន្ថែមថា៖«យើងគួរទៅណា? តើយើងយកកូនទៅណា? យើងគ្មានកន្លែងត្រូវទៅ ហើយក៏គ្មានអ្វីសម្រាប់បរិភោគដែរ។

អ្នកស្រុករាប់រយនាក់នៃភូមិនានានៅព្រំដែនភាគពាយ័ព្យនៃប្រទេសឥណ្ឌា ជាមួយប៉ាគីស្ថាន ត្រូវបានជម្លៀសចេញ ខណៈដែលគូប្រជែងធំ បានកំណត់គោលដៅលើមូលដ្ឋានយោធារបស់គ្នាទៅវិញទៅមកដោយមីស៊ីល និងយានដ្រូន ដោយបានសម្លាប់ជនស៊ីវិលប្រហែល ៧០នាក់ បន្ទាប់ពីទីក្រុងញូវដែលី បានវាយប្រហារអ្វីដែលខ្លួនបាននិយាយថាជា «ជំរំភេរវករ» ឆ្លងកាត់ព្រំដែន ជាការសងសឹកចំពោះការវាយប្រហារដ៏សាហាវ ដែលកំណត់គោលដៅអ្នកទេសចរហិណ្ឌូ នៅតំបន់កាស្មៀរ កាលពីចុងខែមេសា ដែលបានបណ្តាលឲ្យមនុស្ស ២៦នាក់ស្លាប់។