លោកប្រធានាធិបតី Aleksandar Vucic នៅថ្ងៃអង្គារ (ទី១៣ ខែឧសភា) នេះ បាននិយាយថា ប្រទេសស៊ែប៊ី នៅតែប្តេជ្ញាចិត្ត ចំពោះផែនការចូលរួមជាមួយសហភាពអឺរ៉ុប (EU) ហើយចង់ពន្លឿនដំណើរការស្នើសុំសមាជិកភាពនេះ បន្ទាប់ពីការធ្វើដំណើររបស់លោកទៅកាន់ទីក្រុងមូស្គូថ្មីៗនេះ បាននាំឲ្យមានការរិះគន់ពីលោកខាងលិច។

លោក Vucic បានធ្វើដំណើរទៅប្រទេសរុស្ស៊ីនៅថ្ងៃទី៨ និងទី៩ ខែឧសភា ដើម្បីចូលរួមពិធីព្យុហយាត្រារំលឹកខួបលើកទី៨០ នៃជ័យជម្នះ ក្នុងសង្គ្រាមលោកលើកទី២។ ហើយនៅទីនោះ លោកក៏បានជួបផងដែរជាមួយមេដឹកនាំរុស្ស៊ី លោក Vladimir Putin និងប្រធានាធិបតីចិន លោក ស៊ី ជីនពីង (Xi Jinping)។

បន្ទាប់ពីបានជួបប្រធានក្រុមប្រឹក្សាអឺរ៉ុប លោក Antonio Costa នៅថ្ងៃអង្គារនេះ លោក Vucic បាននិយាយថា ទីក្រុង Belgrade ចង់ពន្លឿនការធ្វើសមាហរណកម្មអឺរ៉ុបរបស់ខ្លួន និងបើកដំណាក់កាលចរចាបន្ថែមទៀតជាមួយប្លុកនេះ។

លោកបានបញ្ជាក់ថា៖ «បរិយាកាស (នៅក្នុងសហភាពអឺរ៉ុប) គឺមិនសូវជាល្អប្រសើរប៉ុន្មាននោះឡើយ សម្រាប់ពេលនេះ ខ្ញុំមានទំនុកចិត្ត ដោយសារតែការធ្វើដំណើរទៅទីក្រុងមូស្គូ ប៉ុន្តែខ្ញុំជឿថា អឺរ៉ុបនឹងមានការយល់ដឹង ចំពោះវឌ្ឍនភាពដោយផ្អែកលើគុណសម្បត្តិ ពោលគឺមិនសម្រេចអ្វីដោយសារអារម្មណ៍នយោបាយ»។

លោក Vucic ដែលត្រូវបានហ៊ុមព័ទ្ធដោយការតវ៉ាប្រឆាំងអំពើពុករលួយជាច្រើនខែដឹកនាំដោយនិស្សិត បានសន្យាថា រដ្ឋាភិបាលនឹងធ្វើការ ដើម្បីដាក់ចេញនូវកំណែទម្រង់ដែលចាំបាច់ សម្រាប់ការចូលរួមជាមួយសហភាពអឺរ៉ុប៕