នៅថ្ងៃអង្គារនេះ ចិន និងប្រេស៊ីល បានសន្យាការពារពាណិជ្ជកម្មសេរី និងពហុភាគីនិយម ពេលដែលប្រទេសទាំង ២បានចុះហត្ថលេខាលើកិច្ចព្រមព្រៀងចំនួន ២០នៅទីក្រុងប៉េកាំង ដើម្បីពង្រឹងទំនាក់ទំនងរបស់ពួកគេ ស្របពេលកើតមានភាពពុំច្បាស់លាស់ពាណិជ្ជកម្មសកល ។

សារព័ត៌មានរដ្ឋចិន CCTV រាយការណ៍ថា ប្រធានាធិបតីចិនលោក Xi Jinping បាននិយាយប្រាប់ប្រធានាធិបតីប្រេស៊ីលលោក Luiz Inacio Lula da Silva ថា ប្រទេសទាំង ២គួរតែជំទាស់ឯកតោភាគីនិយម ការគាំពារនិយម និងទង្វើគំរាមកំហែង ។

យោងតាមរូបភាពវីដេអូឃ្លីបបង្ហាញដោយទូរទស្សន៍រដ្ឋប្រេស៊ីលឃើញលោក Lula និយាយថា ទំនាក់ទំនងប្រទេសទាំង ២ ពុំដែលចាំបាច់ជាងនេះនោះទេ ។

ប្រធានាធិបតីទាំង ២បានចូលរួមពិធីចុះហត្ថលេខាលើកិច្ចព្រមព្រៀង រួមទាំងកិច្ចព្រមព្រៀងរំពឹងទុកខ្ពស់សម្រាប់ការនាំចេញកសិកម្មប្រេស៊ីលបន្ថែមទៀតទៅកាន់ប្រទេសចិន ។

សូមបញ្ជាក់ថា លោក Lula ស្ថិតនៅទីក្រុងប៉េកាំង សម្រាប់ដំណើរទស្សនកិច្ចផ្លូវរដ្ឋរយៈពេល ៤ថ្ងៃ ហើយលោកនឹងចូលរួមវេទិកាកម្រិតខ្ពស់នៅទីក្រុងប៉េកាំងជាមួយក្រុមមេដឹកនាំអាមេរិឡាទីន និងអាមេរិកកណ្តាលដទៃទៀត រួមទាំងប្រធានាធិបតីឈីលីលោក Gabriel Boric និងប្រធានាធិបតីកូឡុំប៊ីលោក Gustavo Petro ៕