ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃពុធ (១៤ ឧសភា) នេះថា មេដឹកនាំកូរ៉េខាងជើង លោក គីម ជុងអ៊ុន បានទៅត្រួតពិនិត្យសមយុទ្ធរួមគ្នានៃក្រុមប្រតិបត្តិការយោធាពិសេស ដោយសង្កត់ធ្ងន់ថា កិច្ចការ "ដ៏សំខាន់បំផុត" សម្រាប់កងកម្លាំងប្រដាប់អាវុធកូរ៉េខាងជើង គឺត្រូវរៀបចំត្រៀមលក្ខណៈឱ្យបានពេញលេញសម្រាប់ធ្វើសង្គ្រាម។

KCNA បានឱ្យដឹងថា សមយុទ្ធយុទ្ធសាស្ត្ររួមបញ្ចូលគ្នានៃកងប្រតិបត្តិការពិសេស និងការហ្វឹកហ្វឺនបាញ់ប្រហាររួមរបស់កងអនុសេនាតូចរថក្រោះ បានធ្វើឡើងកាលពីថ្ងៃអង្គារ ម្សិលមិញនេះ។

KCNA ដកស្រង់សម្ដីលោក គីម ដែលបាននិយាយថា "កងកម្លាំងប្រដាប់អាវុធបដិវត្តន៍របស់កូរ៉េខាងជើង ឥឡូវនេះទទួលបន្ទុកលើជួរមុខសំខាន់ៗជាច្រើន ជាពិសេសគឺជួរមុខប្រឆាំងនឹងចក្រពត្តិនិយម ហើយការត្រៀមរៀបចំឱ្យបានពេញលេញសម្រាប់ធ្វើសង្គ្រាម គឺជាកិច្ចការសំខាន់បំផុត"។

រូបថតដែលចេញផ្សាយដោយទីភ្នាក់ងារព័ត៌មានរដ្ឋ KCNA បង្ហាញថា លោក គីម កំពុងសង្កេតមើលសមយុទ្ធ និងជួបជាមួយក្រុមមន្ត្រីយោធា និងទាហាន។ ក្នុងអំឡុងដំណើរទស្សនកិច្ចទៅកាន់ស្ថានទូតរុស្ស៊ី នៅទីក្រុងព្យុងយ៉ាង កាលពីសប្តាហ៍មុន លោក គីម ព្រមានថា កូរ៉េខាងជើងនឹងមិនស្ទាក់ស្ទើរក្នុងការប្រើកម្លាំងយោធានោះទេ ប្រសិនបើសហរដ្ឋអាមេរិក នៅតែប្រកាន់ខ្ជាប់នូវអ្វីដែលលោកបានពិពណ៌នាថាជាការញុះញង់យោធាប្រឆាំងនឹងរុស្ស៊ី៕