ក្រឹត្យរបស់សេតវិមាន និងអ្នកជំនាញផ្នែកឧស្សាហកម្មបានឱ្យដឹងថា សហរដ្ឋអាមេរិក នឹងកាត់បន្ថយពន្ធលើកញ្ចប់ទំនិញតម្លៃទាប ឬត្រូវគេស្គាល់ថា "ពន្ធតូចតាច" សម្រាប់ការនាំចេញពាណិជ្ជកម្មតម្លៃទាបៗពីចិន មកនៅត្រឹម ៣០% ក្នុងជំហានបន្ធូរបន្ថយកាន់តែខ្លាំងលើសង្គ្រាមពាណិជ្ជកម្មរវាងប្រទេសមានសេដ្ឋកិច្ចធំជាងគេទាំងពីររបស់ពិភពលោក។

ក្រឹត្យដែលបានចេញផ្សាយកាលពីល្ងាចថ្ងៃចន្ទនេះ ផ្តល់ការធូរស្រាលខ្លះដល់ពាណិជ្ជកម្មអេឡិចត្រូនិកធំៗរបស់ចិន ដូចជា Shein និង Temu ហើយកើតឡើងក្រោយកិច្ចព្រមព្រៀងចុងសប្តាហ៍រវាងទីក្រុងប៉េកាំង និងទីក្រុងវ៉ាស៊ីនតោន ដើម្បីបន្ទាបពន្ធភាគច្រើនរយៈពេល ៩០ថ្ងៃ ដែលភាគីទាំងពីរដាក់លើទំនិញរបស់គ្នាទៅមកចាប់តាំងពីដើមខែមេសា។

សេចក្តីថ្លែងការណ៍រួមរបស់ភាគីទាំងពីរបន្ទាប់ពីកិច្ចពិភាក្សាទីក្រុងហ្សឺណែវ មិនបាននិយាយពីពន្ធតូចតាចនេះទេ ប៉ុន្តែក្រឹត្យដែលចុះហត្ថលេខាដោយលោកប្រធានាធិបតី Donald Trump បញ្ជាក់ថា ការយកពន្ធតូចតាចសម្រាប់ "ការដឹកជញ្ជូនប្រៃសណីយ៍ដោយផ្ទាល់ទៅអតិថិជន" ធ្លាក់មកត្រឹម ៥៤% ពីអត្រា ១២០% ពីមុន សម្រាប់ទំនិញដែលមានតម្លៃរហូតដល់ ៨០០ដុល្លារ ដោយចាប់ផ្តើមពីថ្ងៃពុធ ១៤ ឧសភា នេះ ជាមួយនឹងថ្លៃសេវាចំនួន ១០០ដុល្លារក្នុងមួយកញ្ចប់ប្រៃសណីយ៍ នៅតែជាធរមាន។

ចំណែកកញ្ចប់ទំនិញតម្លៃក្រោម ៨០០ដុល្លារ ដែលគ្រប់គ្រងដោយក្រុមហ៊ុនពាណិជ្ជកម្ម ដូចជា UPS FedEx និង DHL ដែលបានដឹកជញ្ជូនកញ្ចប់ទំនិញ Shein និង Temu រាប់លានមុខ រងច្បាប់ពន្ធផ្សេងៗគ្នា ដោយប្រភពឧស្សហកម្មនិយាយថា អត្រាតម្លៃសម្រាប់កញ្ចប់ទាំងនោះ ឥឡូវនេះ ស្ថិតក្រោមពន្ធ ៣០% ប៉ុណ្ណោះពីតួលេខ ១៤៥% សម្រាប់ការនាំចូលទូទៅរបស់ចិនពីមុន៕