ប្រធានាធិបតីអ៊ុយក្រែន លោក Volodymyr

Zelenskiy និយាយថា លោកនឹងរង់ចាំមេដឹកនាំរុស្ស៊ី លោក Vladimir Putin នៅទីក្រុងអង់ការ៉ា ប្រទេសទួរគី នៅថ្ងៃព្រហស្បតិ៍ ទី១៥ ខែឧសភា សម្រាប់ការចរចា។ លោក Putin ពុំទាន់បាននិយាយថាតើ លោកនឹងចូលរួមក្នុងការចរចានេះឬយ៉ាងណានោះទេ ខណៈប្រធានាធិបតីសហរដ្ឋអាមេរិក លោក Donald Trump បានជំរុញឱ្យភាគីទាំងពីរចូលរួម ជាផ្នែកនៃកិច្ចខិតខំប្រឹងប្រែងរបស់ទីក្រុងវ៉ាស៊ីនតោន ដើម្បីបញ្ឈប់សង្រ្គាមរយៈពេល៣ឆ្នាំមកនេះ។

លោក Zelenskiy បានប្រាប់អ្នកសារព័ត៌មាននៅទីក្រុងគីវ ថា លោកនឹងទៅកាន់ទីក្រុងអង់ការ៉ា នៅថ្ងៃព្រហស្បតិ៍ដើម្បីចរចា ដោយលោកនឹងជួបជាមួយប្រធានាធិបតីទួរគី លោក Recep Tayyip Erdogan ហើយយើងទាំងពីរនឹងរង់ចាំលោក Putin មកដល់។ លោក Zelenskiy និយាយថា លោកនឹង «ធ្វើអ្វីៗគ្រប់យ៉ាងដើម្បីព្រមព្រៀងឲ្យមានបទឈប់បាញ់ ព្រោះថាវាអាស្រ័យលើលោកPutin ដែលខ្ញុំត្រូវតែចរចាបទឈប់បាញ់ មានតែលោកទេដែលអាចសម្រេចលើបញ្ហានេះ» ។

មេដឹកនាំអ៊ុយក្រែន បាននិយាយបន្ថែមថា ប្រសិនបើមេដឹកនាំរុស្ស៊ី មិនបង្ហាញខ្លួន នោះមេដឹកនាំអឺរ៉ុប និងអាមេរិក នឹងធ្វើតាមអ្វីដែលបានគំរាមជុំវិញការដាក់ទណ្ឌកម្មបន្ថែមនិងធ្ងន់ធ្ងរលើប្រទេសរុស្ស៊ី។ ទីក្រុងវ៉ាស៊ីនតោន បាននិងកំពុងដាក់សម្ពាធខ្លាំងលើភាគីទាំងសងខាងដើម្បីចូលមករកតុចរចា ចាប់តាំងពីលោក Trump ចូលកាន់តំណែងកាលពីខែមករា ដោយបានសន្យាថានឹងបញ្ចប់សង្គ្រាម។

ប្រធានាធិបតីអាមេរិក លោក Donald Trump និយាយថា រដ្ឋមន្ត្រីការបរទេសអាមេរិក លោក Marco Rubio នឹងចូលរួមកិច្ចប្រជុំដែលបានគ្រោងទុករវាងអ៊ុយក្រែន និងរុស្ស៊ី នៅក្នុងប្រទេសទួរគី ហើយវាអាចនឹងមានលទ្ធផលល្អ ។ មេដឹកនាំអឺរ៉ុប បានគំរាមដាក់ទណ្ឌកម្មបន្ថែម ដែលនឹងត្រូវការការគាំទ្រពីសហរដ្ឋអាមេរិក ទៅលើប្រធានាធិបតីរុស្ស៊ី លោក Vladimir Putin ប្រសិនបើលោកមិនយល់ព្រមចំពោះបទឈប់បាញ់រយៈពេល៣០ថ្ងៃនៅអ៊ុយក្រែន ក្នុងពេលប៉ុន្មានថ្ងៃខាងមុខនេះ។