​បាល់ទាត់៖ ​ការ​ចាប់​ឆ្នោត​វគ្គ ១៦ក្រុម​ចុងក្រោយ​នៃ​ក្របខណ្ឌ UEFA Champions League ត្រូវបាន​ធ្វើឡើង​នៅ​ល្ងាច​ថ្ងៃចន្ទ​ម្សិលមិញ តែ​ត្រូវធ្វើ​ឡើងដល់​ទៅ ២ដងដោយ​សារ​កំហុស​ប​ច្ចេកទេស​របស់ UEFA​។ ​​ដំបូង Manchester United ត្រូវបាន​ចាប់ឆ្នោត​ជួប​ជាមួយ Paris Saint Germain ដែល​នឹង​ជា​ជំនួប​រវាង Messi និង Ronaldo តែ​ក្រោយពី​រកឃើញ​កំហុស​បច្ចេកទេស​ការចាប់​ឆ្នោត​ទាំងស្រុង​ត្រូវធ្វើ​ឡើងវិញ​ក្រោយ UEFA ពិនិត្យ​មិន​សព្វ​ជ្រុង​ជ្រោង​ពោលគឺ Manchester United ដែល​ស្ថិតក្នុង​ពូ​ល​ជាមួយ Villarreal នោះ​បែរ​ជា​ស្ថិតក្នុង​លទ្ធភាព​ដែល​អាច​ជួបគ្នា​ទៀត ដែល​នេះ​គឺ​ខុសពី​រូបមន្ត​នៃ​ការចាប់​ឆ្នោត​របស់ UEFA​។​

​​យ៉ាងណាក្តី​ការចាប់​ឆ្នោត​ឡើងវិញ​នៅវេលា​ម៉ោង ៩យប់​នៅ​កម្ពុជា Manchester United ត្រូវ​ជួប​ជាមួយ Atletico Madrid វិញ​ដែល​នឹង​ជាការ​ប្រកួត​ដែល​អ្នកចាំទី David De Gea ជួប​ជាមួយ​ក្លិប​ចាស់​របស់ខ្លួន​។ ​​ចំណែក​ក្រុម​ការពារ​ជើង​ឯកតោ​ខៀវ Chelsea ត្រូវ​ជួប​ជាមួយ​ក្រុម​ជើងឯក​បារាំង Lille ខណៈ Liverpool ជួប​ជើងឯក​អ៊ីតាលី Inter Milan​។ ​​PSG ដែល​ដំបូង​ចាប់ឆ្នោត​ជួប Manchester United នោះ​ចាប់​លើក​ទី២ កាន់តែ​ធ្ងន់​ដោយ​ត្រូវ​ជួប​ជា​ក្រុម​ជើងឯក​ច្រើន​សម័យកាល​ជាងគេ Real Madrid​។​ ​​លទ្ធផល​ចាប់ឆ្នោត​ផ្សេងទៀត​មាន​៖ Sporting Lisbon ជួប Manchester City, Villarreal ជួប Juventus, Red Bull Salzburg ជួប Bayern Munich និង Benfica ជួប Ajax​។ ​ការប្រកួត​វគ្គ ១៦ក្រុម​ចុងក្រោយ​នឹង​ចាប់ផ្តើម​នៅ​ខែកុម្ភៈ​ឆ្នាំក្រោយ​៕

​អត្ថបទ​៖​នាង សុភា​វុ​ធ