សេវាសង្គ្រោះបន្ទាន់របស់ប្រទេសក្រិក បានព្រមានប្រជាជនឱ្យចាកចេញឆ្ងាយពីតំបន់ឆ្នេរសមុទ្រ ជៀសវាងរលកយក្សស៊ូណាមិដ៏គ្រោះថ្នាក់ បន្ទាប់ពីគ្រោះរញ្ជួយដីដ៏ខ្លាំងក្លាបានវាយប្រហារនៅជិតកោះ Kasos របស់ប្រទេស។

យោងតាមទិន្នន័យដែលបានកែសម្រួលពីវិទ្យាស្ថានភូគព្ពសាស្រ្តអាតែន GIA បានឱ្យដឹងថា ការរញ្ជួយដីដ៏ខ្លាំងមួយកម្រិត ៦,០រ៉ិចទ័រ នៅលើមាត្រដ្ឋាន Richter បានវាយប្រហារនៅម៉ោង ១:៥០នាទីរំលងអាធ្រាត្រចូលថ្ងៃពុធ (១៤ ឧសភា) នេះ រវាងប្រជុំកោះក្រិក Kasos និង Karpathos ហើយចំណុចកណ្តាលនៃរញ្ជួយស្ថិតនៅចម្ងាយ ២០គីឡូម៉ែត្រភាគខាងត្បូងនៃកោះ Kasos ជាមួយនឹងជម្រៅប្រសព្វ ៦៤,៤គីឡូម៉ែត្រ។

ការរញ្ជួយនេះត្រូវបានគេមានអារម្មណ៍ដឹងយ៉ាងខ្លាំង នៅក្នុងទីក្រុង Crete, Rhodes និង Kos ដែលជំរុញឱ្យអាជ្ញាធរចេញការព្រមានពីរលកយក្សស៊ូណាមិ។ ការប្រកាសអាសន្ននេះបានសំដៅទៅលើការប៉ាន់ស្មានមុននោះ នៃការរញ្ជួយកម្រិត ៤,៩រ៉ិចទ័រ ចម្ងាយ ៤៨គីឡូម៉ែត្រ ភាគអាគ្នេយ៍នៃកោះ Kasos។

អ្នកជំនាញផ្នែករញ្ជួយដី និងជាប្រធានអង្គការផែនការ និងការពាររញ្ជួយដីរបស់ក្រិក (OASP) លោក Efthymios Lekkas បាននិយាយថា លក្ខណៈសំខាន់នៃការរញ្ជួយដីនេះគឺជម្រៅដ៏ជ្រៅ ៦០គីឡូម៉ែត្រ ហើយ "នេះមានន័យថា ការរង្គើដ៏គ្រោះថ្នាក់ទៅដល់កោះ Kasos និង Karpathos ត្រូវបានកាត់បន្ថយ" ដោយបញ្ជាក់ថា មិនមានការខូចខាតធំណាមួយត្រូវបានគេរាយការណ៍ទេមកទល់ពេលនេះ៕