បណ្ដាមេដឹកនាំអឺរ៉ុប រួមទាំងប្រធានាធិបតីបារាំង លោក Emmanuel Macron កាលពីថ្ងៃអង្គារ (១៣ ឧសភា) បានព្រមានពីការដាក់ទណ្ឌកម្មថ្មីៗលើរុស្ស៊ី នៅប៉ុន្មានថ្ងៃខាងមុខនេះ ប្រសិនបើទីក្រុងមូស្គូ បរាជ័យក្នុងការយល់ព្រមលើបទឈប់បាញ់មួយ ដោយលើកពីសេវាកម្មហិរញ្ញវត្ថុ ប្រេង និងឧស្ម័ន ថាអាចក្លាយជាគោលដៅទណ្ឌកម្មថ្មីនោះ។

លោក Macron បាននិយាយនៅក្នុងបទសម្ភាសន៍មួយនៅលើទូរទស្សន៍ TF1 ថា "ចេតនារបស់បារាំង គឺដាក់ទណ្ឌកម្មថ្មីប្រឆាំងនឹងរុស្ស៊ី នៅប៉ុន្មានថ្ងៃខាងមុខ" ប្រសិនបើទីក្រុងមូស្គូ បដិសេធមិនអនុវត្តបទឈប់បាញ់"។

ការអត្ថាធិប្បាយរបស់លោក Macron បានជំរុញពីលើការគំរាមរបស់លោកអធិការបតីអាល្លឺម៉ង់ Friedrich Merz នៅព្រឹកថ្ងៃអង្គារ ដែលបាននិយាយថា សម្ព័ន្ធមិត្តអ៊ឺរ៉ុប នឹងដាក់ចេញ "ការរឹតបន្តឹងយ៉ាងសំខាន់" លើរុស្ស៊ី ប្រសិនបើលោកប្រធានាធិបតី Vladimir Putin មិនយល់ព្រមចំពោះបទឈប់បាញ់។

បណ្ដាមេដឹកនាំផ្សេងទៀតដូចជាចក្រភពអង់គ្លេស បារាំង អាល្លឺម៉ង់ និងប៉ូឡូញ បាននិយាយរួចហើយកាលពីថ្ងៃសៅរ៍ចុងសប្ដាហ៍មុនថា រុស្ស៊ី នឹងរងការវាយប្រហារដោយវិធានការដាក់ទណ្ឌកម្មថ្មី ប្រសិនបើខ្លួនមិនស្តាប់ការអំពាវនាវឱ្យមានបទឈប់បាញ់រយៈពេល ៣០ថ្ងៃក្នុងសង្រ្គាមរបស់ខ្លួនជាមួយអ៊ុយក្រែន នៅរយៈពេលប៉ុន្មានថ្ងៃខាងមុខទេនោះ៕