សេចក្តីថ្លែងការណ៍ពីការិយាល័យបាននិយាយកាលពីថ្ងៃអង្គារទី១៣ ឧសភា ថា នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា យោធានឹងចូលទៅក្នុងតំបន់ហ្កាហ្សា «ដោយកម្លាំងពេញលេញ» ក្នុងរយៈពេលប៉ុន្មានថ្ងៃខាងមុខនេះ។

នៅព្រឹកថ្ងៃពុធនេះ កងទ័ពអ៊ីស្រាអែល បានចេញបទបញ្ជាជម្លៀសសម្រាប់តំបន់នានានៅភាគខាងជើងតំបន់ហ្កាហ្សា។

លោក Netanyahu បាននិយាយក្នុងអំឡុងជួបជាមួយទាហានបម្រុងដែលរងរបួសនៅក្នុងការិយាល័យរបស់លោកថា «នៅប៉ុន្មានថ្ងៃខាងមុខនេះ យើងនឹងដាក់កម្លាំងពេញលេញដើម្បីបញ្ចប់ប្រតិបត្តិការ។ ការបញ្ចប់ប្រតិបត្តិការមានន័យថាកម្ទេចក្រុមហាម៉ាស»។

លោកបាននិយាយបន្ថែមថា «នឹងគ្មានស្ថានភាពណាមួយដែលយើងបញ្ឈប់សង្រ្គាមនោះទេ។ បទឈប់បាញ់បណ្តោះអាសន្នអាចនឹងកើតឡើង ប៉ុន្តែយើងកំពុងបន្តទៅគ្រប់វិធី» ។

កាលពីដើមខែនេះ រដ្ឋាភិបាលអ៊ីស្រាអែលបានអនុម័តផែនការពង្រីកការវាយលុកនៅតំបន់ហ្កាហ្សារបស់ខ្លួន ដោយក្រុមមន្ត្រីនិយាយអំពីការរក្សាវត្តមានរយៈពេលវែងនៅទីនោះ។

យោធាអ៊ីស្រាអែល និយាយថា ប្រតិបត្តិការដ៏ទូលំទូលាយតាមផែនការ បានធ្វើឲ្យមានការថ្កោលទោសពីអន្តរជាតិ នឹងបានធ្វើឲ្យប្រជាជនភាគច្រើននៅដែនដីប៉ាឡេស្ទីន ភៀសខ្លួនចេញ។