ប្រធានាធិបតីប្រទេសប្រេស៊ីល លោក Luiz Inacio Lula da Silva បានសរសើរទំនាក់ទំនងពាណិជ្ជកម្ម និងជាយុទ្ធសាស្ត្រដ៏រឹងមាំរវាងប្រទេសចិន និងប្រទេសនៅអាមេរិកឡាទីន ក្នុងអំឡុងកិច្ចប្រជុំកំពូលនៅទីក្រុងប៉េកាំង រវាងសហគមន៍រដ្ឋអាមេរិកឡាទីននិងតំបន់សមុទ្រការ៉ាអ៊ីប(CELAC) និងរដ្ឋាភិបាលចិន កាលពីថ្ងៃអង្គារ ទី១៣ ឧសភា។

ប្រធានាធិបតីប្រទេសកូឡុំប៊ី លោក Gustavo Petro បានសង្កត់ធ្ងន់លើតម្រូវការក្នុងការដោះស្រាយវិបត្តិអាកាសធាតុ និងវិនិយោគលើថាមពលស្អាត ខណៈប្រធានាធិបតីប្រទេសឈីលី លោក Gabriel Boric បានគាំទ្រស្វ័យភាពជាយុទ្ធសាស្ត្ររបស់ប្រទេសលោកក្នុងការសម្រេចចិត្តក្នុងវិស័យពាណិជ្ជកម្ម។

ព្រឹត្តិការណ៍នេះ បានប្រារព្ធខួបលើកទី១០ នៃវេទិកាសហគមន៍រដ្ឋអាមេរិកឡាទីននិងតំបន់សមុទ្រការ៉ាអ៊ីប(CELAC)-ចិន ក្នុងបរិបទពិភពលោកនៃការកើនឡើងភាពតានតឹងពាណិជ្ជកម្ម ខណៈបណ្តាប្រទេសនៅអាមេរិកឡាទីន កំពុងស្វែងរកការចរចាលក្ខខណ្ឌពាណិជ្ជកម្មកាន់តែប្រសើរជាមួយសហរដ្ឋអាមេរិក។

ប្រធានាធិបតីចិន លោក ស៊ី ជីនពីង បានប្រកាសផ្តល់បណ្តាញឥណទានចំនួន៩ពាន់លានដុល្លារ និងការវិនិយោគហេដ្ឋារចនាសម្ព័ន្ធសម្រាប់អាមេរិកឡាទីន ទោះបីជាប្រទេសប្រេស៊ីល បានព្រមានប្រឆាំងការពឹងផ្អែកខ្លាំងលើការផ្តល់មូលនិធិពីបរទេសក៏ដោយ។