នាយករដ្ឋមន្ត្រីប្រទេសប៉េរូ លោក Gustavo Adrianzen បានលាលែងពីតំណែង កាលពីថ្ងៃអង្គារ ទី១៣ ខែឧសភា មួយថ្ងៃមុនពេលលោកត្រូវបានកំណត់ឱ្យប្រឈមទៅនឹងការបោះឆ្នោតត្រួតពិនិត្យនៅក្នុងសភាទាក់ទងនឹងការកើនឡើងឧក្រិដ្ឋកម្ម និងការសម្លាប់ក្រុមកម្មករអណ្តូងរ៉ែ កាលពីពេលថ្មីៗនេះ។

ការចាកចេញរបស់ លោក Adrianzen គឺជាការសាកល្បងចុងក្រោយសម្រាប់ប្រធានាធិបតីប្រទេសប៉េរូ លោកស្រី Dina Boluarte ពុំសូវមានប្រជាប្រិយភាព ដែលបច្ចុប្បន្ននេះត្រូវដាក់ជំនួសគណៈរដ្ឋមន្ត្រីទាំងមូលរបស់លោកស្រី។ លោកស្រី អាចតែងតាំងរដ្ឋមន្ត្រីមុនៗឱ្យកាន់តួនាទីដដែល ប៉ុន្តែស្ថិតក្រោមនាយករដ្ឋមន្ត្រីថ្មី។

ការវាយតម្លៃព្រមព្រៀងរបស់លោកស្រី Boluarte បានធ្លាក់ចុះដល់កម្រិតទាបជាប្រវត្តិសាស្ត្រ ដោយការស្ទង់មតិដែលបានចេញផ្សាយក្នុងសប្តាហ៍នេះបង្ហាញពីការគាំទ្រត្រឹមតែ ២% ប៉ុណ្ណោះ។

រដ្ឋបាលរបស់លោកស្រី ស្ថិតនៅក្រោមសម្ពាធដើម្បីប្រយុទ្ធប្រឆាំងឧក្រិដ្ឋកម្មដែលកំពុងកើនឡើង ហើយការចាប់ពង្រត់ និងសម្លាប់កម្មករអណ្តូងរ៉ែចំនួន១៣នាក់ដោយអ្នករុករករ៉ែខុសច្បាប់កាលពីដើមខែនេះ បានជំរុញការអំពាវនាវឱ្យលោក Adrianzen លាចេញពីតំណែង។