ខណៈបទឈប់បាញ់រវាងប្រទេសឥណ្ឌា និងប៉ាគីស្ថាន នៅតែបន្តមាន អ្នកដែលត្រូវបានជម្លៀសខ្លួនចេញពីភូមិនានាក្នុងតំបន់កាស្មៀរគ្រប់គ្រងដោយឥណ្ឌា បានចាប់ផ្តើមវិលត្រឡប់ទៅវិញ។ ប៉ុន្តែមនុស្សជាច្រើនបានឃើញលំនៅឋានរបស់ពួកគេត្រូវបានបំផ្លាញ ហើយចង់បានសំណង។

រយៈពេលបួនថ្ងៃនៃការប្រយុទ្ធគ្នាយ៉ាងខ្លាំងរវាងគូប្រជែងមានអាវុធនុយក្លេអ៊ែរទាំងពីរ បានសម្លាប់ជនស៊ីវិលប្រហែល ៧០ នាក់។ វាបានបង្កឡើងបន្ទាប់ពីទីក្រុងញូវឌេលី បានវាយប្រហារទៅលើអ្វីដែលខ្លួនបាននិយាយថាជា «ជំរំភេរវករ» ហើយវាបានកើតឡើងក្នុងការសងសឹកចំពោះការវាយប្រហារដ៏បង្ហូរឈាមទៅលើអ្នកទេសចរសាសនាហិណ្ឌូដោយក្រុមសកម្មប្រយុទ្ធអ៊ីស្លាមនិយមនៅតំបន់កាស្មៀរប្រទេសឥណ្ឌាកាលពីខែមុន ដែលបានសម្លាប់មនុស្ស២៦នាក់។

ភាគីប៉ាគីស្ថាន បានច្រានចោលការចោទប្រកាន់របស់ប្រទេសឥណ្ឌាថាបានគាំទ្រក្រុមសកម្មប្រយុទ្ធដែលបានវាយប្រហារនៅប្រទេសឥណ្ឌា។

ការប៉ះទង្គិចចុងក្រោយ ជាការប៉ះទង្គិចគ្នាអាក្រក់បំផុតក្នុងរយៈពេលជាងពីរទសវត្សរ៍មកនេះ ដែលត្រូវបានបញ្ចប់កាលពីថ្ងៃសៅរ៍សប្តាហ៍កន្លងទៅនេះ នៅពេលដែលភាគីទាំងពីរបានព្រមព្រៀងលើបទឈប់បាញ់។