អ្នកនាំពាក្យរបស់ទីភ្នាក់ងារការពារជនស៊ីវិលគ្រប់គ្រងដោយក្រុមហាម៉ាស បាននិយាយថា ការវាយប្រហារតាមអាកាសរបស់អ៊ីស្រាអែលបានសម្លាប់មនុស្ស ២៨ នាក់ និងរាប់សិបនាក់រងរបួសនៅឯមន្ទីរពេទ្យអឺរ៉ុបក្នុងទីក្រុង Khan Younis ។

យោងតាមប្រភពក្នុងស្រុកបានឱ្យដឹងថា យន្តហោះចម្បាំងអ៊ីស្រាអែលបានទម្លាក់គ្រាប់បែកចំនួនប្រាំមួយគ្រាប់ក្នុងពេលដំណាលគ្នាទៅលើមន្ទីរពេទ្យហ្កាហ្សា ដោយបានវាយប្រហារទាំងទីធ្លាខាងក្នុង និងតំបន់ជុំវិញមន្ទីរពេទ្យ។

យោធាអ៊ីស្រាអែលបាននិយាយថា ខ្លួនបានបើកការវាយប្រហារយ៉ាងជាក់លាក់ទៅលើ "ភេរវករហាម៉ាសនៅក្នុងមជ្ឈមណ្ឌលបញ្ជាការ និងគ្រប់គ្រង" ដែលខ្លួនបានអះអាងថាស្ថិតនៅក្រោមមន្ទីរពេទ្យនោះ។

អ្នកកាសែតឯករាជ្យម្នាក់ដែលធ្វើការឱ្យទូរទស្សន៍ BBC ក្នុងតំបន់ហ្កាហ្សា ស្ថិតក្នុងចំណោមអ្នករងរបួសក្នុងការវាយប្រហារតាមអាកាស។

ការវាយប្រហារនៅមន្ទីរពេទ្យអឺរ៉ុប បានបណ្តាលឱ្យមានរណ្ដៅជ្រៅជាច្រើននៅខាងក្នុងបរិវេណមន្ទីរពេទ្យដែលបានកប់រថយន្តជាច្រើនគ្រឿង ។

លោកនាយករដ្ឋមន្ត្រីអ៊ីស្រាអែល Benjamin Netanyahu និយាយថា គ្មានផ្លូវដែលអ៊ីស្រាអែលបញ្ឈប់សង្គ្រាមនៅហ្កាហ្សាទេ ទោះកិច្ចព្រមព្រៀងមួយត្រូវបានឈានដល់ដើម្បីដោះលែងចំណាប់ខ្មាំងបន្ថែមទៀតនៅក្នុងទឹកដីដែលត្រូវបានឡោមព័ទ្ធ និងទម្លាក់គ្រាប់បែកក៏ដោយ។ លោកបានគំរាមវាយប្រហារដោយយោធាពេញបន្ទុកនៅប៉ុន្មានថ្ងៃខាងមុខ៕