ខណៈដែលអ៊ីស្រាអែល ដាក់ចេញគម្រោងពង្រីកប្រតិបត្តិការយោធានៅដែនដីហ្កាហ្សា មន្ត្រីជាន់ខ្ពស់អ៊ីស្រាអែលមួយរូបបានប្រាប់សារព័ត៌មាន Newsweek ថា លោកនាយករដ្ឋមន្ត្រី Benjamin Netanyahu កំពុងឈរពីក្រោយចក្ខុវិស័យរបស់លោកប្រធានាធិបតីអាមេរិក Donald Trump ក្នុងការប្រែក្លាយទឹកដីប៉ាឡេស្ទីនដែលហែកហួរដោយសង្រ្គាមមួយនេះ ឱ្យក្លាយទៅជាទិសដៅទេសចរមជ្ឈិមបូព៌ាដែលគ្រាប់គ្នាចង់ទៅកម្សាន្ត។

អគ្គកុងស៊ុលអ៊ីស្រាអែល នៅទីក្រុងញូវយ៉ក របស់អាមេរិក លោក Ofir Akunis បានអះអាងថា ថ្ងៃណាមួយ តំបន់ហ្កាហ្សា អាចលេចចេញជារូបរាងតាមរចនាបថរបស់ប្រទេសអារ៉ាប់រួម ដែលទីក្រុងវាលខ្សាច់ធំៗនៅតាមឆ្នេរសមុទ្ររបស់ប្រទេសនេះ រួមទាំងទីក្រុងឌុយបៃ និងអាប៊ូដាប៊ីជាដើម ឥឡូវនេះទាក់ទាញភ្ញៀវទេសចរ និងទុនវិនិយោគមកពីជុំវិញពិភពលោក។

លោក Akunis បានប្រាប់ Newsweek ស្ដីពីផែនការខែកុម្ភៈរបស់លោក Trump ក្នុងការប្រែក្លាយតំបន់ហ្កាហ្សាទៅជា "ឆ្នេរលំហែមជ្ឈិមបូព៌ា" ថា "លោកយល់ស្របលើគម្រោងនេះ"។ លោកបន្តថា ក្នុងនាមជាអតីតរដ្ឋមន្ត្រីនៃកិច្ចសហប្រតិបត្តិការក្នុងតំបន់ លោកគិតថាតំបន់ហ្កាហ្សាស្ទ្រីប មានសក្ដានុពលណាស់ ដោយសារឆ្នេរដ៏ធំ និងស្រស់ស្អាត ព្រមទាំងអាកាសធាតុល្អដូចនៅអារ៉ាប់រួម។

ការអត្ថាធិប្បាយរបស់លោក Akunis បានជំរុញបន្ថែមនូវគំនិតរបស់លោក Trump ដែលជាអតីតមហាសេដ្ឋីអចលនទ្រព្យ ដោយមេដឹកនាំអាមេរិករូបនេះបានហៅតំបន់ហ្កាហ្សាជាថ្មីម្តងទៀតថាជា "តំបន់អចលនទ្រព្យដ៏សំខាន់មិនគួរឱ្យជឿ" ហើយបានរំលឹកឡើងវិញពីលទ្ធភាពនៃការចូលរួមដោយផ្ទាល់របស់សហរដ្ឋអាមេរិកក្នុងទឹកដីនេះ ក្នុងអំឡុងពេលកិច្ចប្រជុំចុងក្រោយរបស់លោកជាមួយលោក Netanyahu កាលពីខែមុន៕