សមាជិកគណបក្សសាធារណរដ្ឋ ដែលគ្រប់គ្រងសភាតំណាងរាស្រ្តអាមេរិក បានចាប់ផ្តើមមានការខ្វែងគំនិតផ្ទៃក្នុង ជាមួយនឹងការជជែកដេញដោលជាសាធារណៈលើសសរស្តម្ភសំខាន់ៗនៃច្បាប់ថវិការបស់លោកប្រធានាធិបតី Donald Trump កាលពីថ្ងៃអង្គារ (១៣ ឧសភា) ដោយថ្លឹងថ្លែងលើជម្រើសដ៏លំបាករវាងគោលនយោបាយពន្ធដារ និងការចំណាយលើកម្មវិធីសុវត្ថិភាពសង្គមដ៏ពេញនិយម ដែលអាចប៉ះពាល់ដល់សំឡេងនាំមុខដ៏ស្ដួចស្ដើងរបស់ពួកគេក្នុងសភា។

ផែនការនោះនឹងបន្តទម្លាក់ពន្ធក្នុងប្រទេស ដែលបានអនុម័តនៅអាណត្តិទីមួយរបស់លោក Trump ហើយជំហាននេះអាចបន្ថែមបំណុល ៣៦,២សែនកោដិដុល្លារក្នុងទសវត្សរ៍ក្រោយ។ គណៈកម្មាធិការពន្ធចម្រុះ JTC ទ្វេបក្សរបស់សភា ប៉ាន់ប្រមាណថា ការបន្ថយពន្ធនឹងត្រូវការ ៣,៧២សែនកោដិដុល្លារ ហើយដើម្បីទូទាត់ចំណាយទាំងនេះ កម្មវិធីសុវត្ថិភាពសង្គមដ៏ពេញនិយមជាច្រើននឹងត្រូវលុបចោល។

មន្រ្តីក្នុងគណៈកម្មាធិការនេះបាននិយាយថា "សំណើពន្ធដ៏ធំ និងស្រស់ស្អាតមួយនេះអាចឱ្យរដ្ឋបាល បញ្ឆេះការរីកចម្រើនសេដ្ឋកិច្ចក្នុងអាណត្តិទីពីររបស់លោក Trump និងធ្វើឱ្យជីវិតប្រជាជនរាប់លាននាក់កាន់តែប្រសើរ"។ ប៉ុន្តែតំណាងរាស្រ្តខាងបក្សប្រជាធិបតេយ្យរបស់គណៈកម្មាធិការប្រកែកថា របៀបវារៈពន្ធរបស់លោក Trump ស្មើនឹង "ការកាត់ពន្ធដ៏ធំ និងស្រស់ស្អាតសម្រាប់មហាសេដ្ឋី" ទៅវិញទេ។

លើសពីនេះ សមាជិកបក្សសាធារណរដ្ឋមួយចំនួនបានព្រមានថា ការលុបចោលកម្មវិធីសង្គមអាចបំផ្លាញការគាំទ្រក្នុងចំណោមម្ចាស់ឆ្នោតដែលបោះឱ្យលោក Trump ក្នុងខែវិច្ឆិកា។ អ្នកសាធារណរដ្ឋមួយចំនួនមកពីរដ្ឋដឹកនាំដោយបក្សប្រជាធិបតេយ្យ រួមទាំងញូវយ៉ក និងកាលីហ្វ័រនីញ៉ា បានគំរាមប្រឆាំងនឹងច្បាប់នេះ លុះត្រាតែការកាត់ពន្ធរបស់សហព័ន្ធសម្រាប់ពន្ធរដ្ឋ និងក្នុងតំបន់ មិនធំធេងខ្លាំង៕