សាកលវិទ្យាល័យ Harvard បានពង្រីកពាក្យបណ្ដឹងរបស់ខ្លួន ដែលជំទាស់នឹងចំណាត់ការរបស់រដ្ឋបាលលោកប្រធានាធិបតី Donald Trump ក្នុងការកាត់ផ្តាច់មូលនិធិសហព័ន្ធរាប់ពាន់លានដុល្លារដល់សាលាដ៏ល្បីនេះ កាលពីថ្ងៃអង្គារ (១៣ ឧសភា) បន្ទាប់ពីមន្ត្រីអាមេរិកបាននិយាយថា ពួកគេកំពុងបញ្ចប់ជំនួយចំនួន ៤៥០លានដុល្លារ បន្ថែមទៀត។

សាលា Harvard បានដាក់ពាក្យបណ្តឹងដែលបានកែប្រែថ្មី ទៅតុលាការសហព័ន្ធក្នុងទីក្រុង Boston ប៉ុន្មានម៉ោងបន្ទាប់ពីក្រុមការងារប្រឆាំងជនជាតិជ្វីហ្វសហព័ន្ធបានប្រកាសថា ទីភ្នាក់ងាររដ្ឋាភិបាលចំនួន៨ កំពុងដកជំនួយបន្ថែមនោះ ពីលើទឹកប្រាក់ចំនួន ២,២ពាន់លានដុល្លារ ដែលរដ្ឋបាលលោក Trump បានលុបចោលរួចទៅហើយ។

ក្រុមការងារ ដែលមានតំណាងមកពីទីភ្នាក់ងារនានា រួមទាំងក្រសួងអប់រំ សុខាភិបាល និងយុត្តិធម៌សហរដ្ឋអាមេរិកបានដកជំនួយបន្ថែមទៀត បន្ទាប់ពីចោទសាលានេះថាបានបរាជ័យក្នុងការតតាំងនឹង "ការរើសអើងពូជសាសន៍ និងការបៀតបៀនប្រឆាំងនឹងជនជាតិជ្វីហ្វ ដែលកំពុងញាំញីបរិវេណសាលារបស់ខ្លួន"។

ជាការឆ្លើយតប សាកលវិទ្យាល័យ Harvard បានពង្រីកបណ្តឹង ដែលខ្លួនប្តឹងជាលើកដំបូងនៅថ្ងៃទី២២ ខែមេសា បន្ទាប់ពីរដ្ឋបាលបង្កកប្រាក់ ២,២ពាន់លានដុល្លារដំបូង។ Harvard អះអាងថា ការទាមទារដ៏ច្រើនសន្ធឹកសន្ធាប់របស់រដ្ឋបាល បានរំលោភលើការធានាបញ្ចេញមតិដោយសេរីនៃវិសោធនកម្មទីមួយរបស់រដ្ឋធម្មនុញ្ញសហរដ្ឋអាមេរិក ដោយបន្ថែមថា ការបង្កកមូលនិធិដ៏ធំគឺទូលំទូលាយខ្លាំងពេក ហើយត្រូវបានបង្កើតឡើងដោយមិនអនុវត្តតាមនីតិវិធីត្រឹមត្រូវ៕