ប្រភពការទូតពីររបស់អ៊ឺរ៉ុប និងអ៊ីរ៉ង់ បាននិយាយកាលពីថ្ងៃអង្គារ (១៣ ឧសភា) ថា ប្រទេសអ៊ីរ៉ង់ នឹងធ្វើកិច្ចពិភាក្សានៅទីក្រុងអ៊ីស្តង់ប៊ុល នៅថ្ងៃសុក្រ ១៦ ឧសភា សប្ដាហ៍នេះ ជាមួយភាគីអឺរ៉ុប ចំពោះកិច្ចព្រមព្រៀងនុយក្លេអ៊ែឆ្នាំ២០១៥ ដែលលែងដំណើរការរបស់ពួកគេ។

កិច្ចពិភាក្សារវាងអ្នកការទូតជាន់ខ្ពស់នេះ ធ្វើឡើងនៅពេលដែលភាគីទាំងពីរស្វែងរកជំហររបស់ពួកគេ មុនកិច្ចចរចាជុំទី៥ ដែលរំពឹងទុករវាងសហរដ្ឋអាមេរិក និងអ៊ីរ៉ង់ នៅប៉ុន្មានថ្ងៃខាងមុខ។

កិច្ចពិភាក្សាដំបូងជាមួយចក្រភពអង់គ្លេស បារាំង និងអាល្លឺម៉ង់ ដែលត្រូវបានស្គាល់ថា មហាអំណាចអឺរ៉ុបទាំងបី E3 គ្រោងធ្វើតាំងតែពីថ្ងៃទី០២ ឧសភា ប៉ុន្តែត្រូវពន្យារពេល ព្រោះស្ទាក់ស្ទើរលើក្ដីបារម្ភថា កិច្ចពិភាក្សាបែបនេះអាចបង្កើតផ្លូវស្របគ្នា និងអាចប៉ះពាល់កិច្ចចរចាកំពុងបន្តដោយរដ្ឋបាលលោកប្រធានាធិបតីអាមេរិក Donald Trump ដែលទីក្រុងវ៉ាស៊ីនតោននិយាយថា មានគោលដៅរារាំងអ៊ីរ៉ង់ មិនឱ្យអភិវឌ្ឍអាវុធនុយក្លេអ៊ែរ។

ក្រុមអ្នកការទូតនិយាយថា យ៉ាងណាក៏ដោយ អឺរ៉ុបបានជ្រើសរើសបន្តទៅមុខលើកិច្ចពិភាក្សា ព្រោះជាផលប្រយោជន៍របស់ពួកគេក្នុងការរក្សាកិច្ចសន្ទនាជាមួយអ៊ីរ៉ង់ និងបញ្ជាក់ឡើងវិញពីការគិតគូរលើកិច្ចព្រមព្រៀងនុយក្លេអ៊ែរថ្មី។ ចំណែកអ៊ីរ៉ង់ក៏ចង់រៀបចំកិច្ចពិភាក្សានេះដែរ ដើម្បីរក្សាជម្រើសរបស់ខ្លួនឱ្យបើកចំហ និងវាយតម្លៃជំហររបស់មហាអំណាចអឺរ៉ុបទាំងនេះ ទាក់ទងនឹងការដាក់ទណ្ឌកម្មឡើងវិញរបស់អង្គការសហប្រជាជាតិ នៅក្នុងអ្វីដែលរដ្ឋមន្ត្រីការបរទេសអ៊ីរ៉ង់ បានព្រមានមិនឱ្យធ្វើម្ដងទៀត៕