របាយការណ៍មួយ នៅថ្ងៃពុធ (ទី១៤ ខែឧសភា) នេះ បានព្រមានថា រលកកម្ដៅក្តៅខ្លាំងដែលបណ្តាលមកពីការឡើងកម្ដៅផែនដី កំពុងបង្កើនហានិភ័យពីការមានផលវិបាកដ៏គ្រោះថ្នាក់ អំឡុងពេលមានផ្ទៃពោះ នៅទូទាំងពិភពលោក។

ការប៉ះពាល់នឹងកម្ដៅក្ដៅខ្លាំង អំឡុងពេលមានផ្ទៃពោះ កាលពីមុនត្រូវបានផ្សារភ្ជាប់ទៅនឹងបញ្ហាជាច្រើន ក្នុងនោះរួមទាំងហានិភ័យខ្ពស់នៃការកើតមិនគ្រប់ខែ ការស្លាប់ទារកក្នុងផ្ទៃ ការមានពិការភាពពីកំណើត និងការកើតជំងឺទឹកនោមផ្អែម ពេលមានគភ៌។

របាយការណ៍ថ្មីពីក្រុមស្រាវជ្រាវ Climate Central ដែលមានមូលដ្ឋាននៅសហរដ្ឋអាមេរិក បានព្យាយាមវាយតម្លៃពីកម្រិត ដែលស្ត្រីមានផ្ទៃពោះរងផលប៉ះពាល់ ដោយសារកម្ដៅក្ដៅខ្លាំងស្ទើរទ្រាំមិនបាន ចាប់តាំងពីឆ្នាំ២០២០ និងពីកម្រិតដែលបម្រែបម្រួលអាកាសធាតុជះឥទ្ធិពល។

របាយការណ៍ បានបង្ហាញបន្ថែមថា នៅក្នុងប្រទេស និងដែនដីចំនួន ២២២ ក្នុងចំណោមប្រទេស និងដែនដី ២៤៧ ដែលត្រូវបានសិក្សា «បម្រែបម្រួលអាកាសធាតុយ៉ាងហោចណាស់ បានកើនឡើងទ្វេដងនៃចំនួនប្រចាំឆ្នាំជាមធ្យម អំឡុងថ្ងៃដែលមានហានិភ័យដោយសារកម្ដៅពេលមានផ្ទៃពោះ ក្នុងរយៈពេល ៥ឆ្នាំចុងក្រោយនេះ»។

ការកើនឡើងហានិភ័យធំបំផុតជាងគេ គឺនៅក្នុងប្រទេសកំពុងអភិវឌ្ឍន៍ ដែលលទ្ធភាពទទួលបានសេវាថែទាំសុខភាពមានកម្រិត ដូចជានៅតំបន់ការ៉ាអ៊ីព អាមេរិកកណ្តាល និងខាងត្បូង កោះប៉ាស៊ីហ្វិក អាស៊ីអាគ្នេយ៍ និងអនុតំបន់សាហារ៉ាអាហ្រ្វិក។

តែយ៉ាងណាក្ដី អ្នកស្រាវជ្រាវបានផ្តោតតែលើការកើនឡើងនៃថ្ងៃក្តៅខ្លាំងប៉ុណ្ណោះ ដោយមិនបានវាយតម្លៃថា តើលក្ខខណ្ឌទាំងនោះប៉ះពាល់ដោយផ្ទាល់ដល់ស្ត្រីមានផ្ទៃពោះក្នុងប្រទេសនីមួយៗយ៉ាងដូចម្តេចនោះឡើយ៕