ក្រុមហាម៉ាសកាលពីថ្ងៃអង្គារ បានច្រានចោលការអះអាងរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) ដែលថា សម្ពាធយោធា បានជួយធានាការដោះលែងចំណាប់ថ្នូរអាមេរិក-អ៊ីស្រាអែលលោក Edan Alexander ពីតំបន់ហ្កាហ្សាកាលពីថ្ងៃចន្ទ។

ក្រុមសកម្មប្រយុទ្ធប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយថា៖«ការត្រឡប់មកវិញរបស់ លោក Edan Alexander គឺជាលទ្ធផលនៃការប្រាស្រ័យទាក់ទងយ៉ាងហ្មត់ចត់ជាមួយរដ្ឋបាលសហរដ្ឋអាមេរិក និងការខិតខំប្រឹងប្រែងរបស់អ្នកសម្រុះសម្រួល មិនមែនជាផលវិបាកនៃការឈ្លានពានរបស់អ៊ីស្រាអែល ឬកំហុសនៃសម្ពាធយោធានោះទេ»។

ក្រុមហាម៉ាស បានបន្ថែមថា៖«លោក ណេតាន់យ៉ាហ៊ូ កំពុងបំភាន់ប្រជាជនរបស់ខ្លួន ហើយបានបរាជ័យក្នុងការនាំយកអ្នកទោសរបស់លោកត្រឡប់មកវិញ តាមរយៈការឈ្លានពាន។

កងកម្លាំងប្រដាប់អាវុធរបស់ក្រុមហាម៉ាសកាលពីថ្ងៃចន្ទ បានដោះលែងលោក Alexander វ័យ ២១ឆ្នាំ ដែលត្រូវបានឃុំខ្លួន នៅតំបន់ហ្កាហ្សា ចាប់តាំងពីការវាយប្រហារកាលពីថ្ងៃទី ០៧ ខែតុលា ឆ្នាំ ២០២៣ របស់ក្រុម ទៅលើអ៊ីស្រាអែល ដែលបានបង្កឲ្យសង្រ្គាមផ្ទុះឡើង។

លោក ណេតាន់យ៉ាហ៊ូ បានទទួលស្គាល់ការដោះលែងលោក Alexander ដោយសារមានការរួមបញ្ចូលគ្នានូវសម្ពាធយោធារបស់យើង និងសម្ពាធនយោបាយ ដែលធ្វើឡើងដោយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។