ប្រជាពលរដ្ឋស៊ីរីរស់នៅក្នុងទីក្រុងដាម៉ាស់ បាននាំគ្នាធ្វើដំណើរចេញតាមដងផ្លូវ ដើម្បីអបអរសាទរចំពោះការសម្រេចចិត្តរបស់ប្រធានាធិបតីសហរដ្ឋអាមេរិកលោក Donald Trump ដកចេញទណ្ឌកម្មលើប្រទេសស៊ីរីកាលពីថ្ងៃអង្គារ ។

លោក Trump បាននិយាយកាលពីថ្ងៃអង្គារថា លោកនឹងបញ្ជាឲ្យដកទណ្ឌកម្មលើប្រទេសស៊ីរី តមតាមសំណើរជ្ជទាយាទរបស់អារ៉ាប៊ូសាអ៊ូឌីត ជាការផ្លាស់ប្ដូរគោលនយោបាយដ៏សំខាន់របស់សហរដ្ឋអាមេរិក មុនពេលជំនួបតាមការរំពឹងទុកជាមួយប្រធានាធិបតីស៊ីរីលោក Ahmed al-Sharaa ។

លោក Trump បានធ្វើសេចក្តីប្រកាសគួរឲ្យភ្ញាក់ផ្អើលបែបនេះ នៅពេលចាប់ផ្តើមដំណើរទស្សនកិច្ចនៅបណ្ដារដ្ឋឈូងសមុទ្រអារ៉ាប់ ដែលបានចាប់ផ្តើមនៅប្រទេសអារ៉ាប៊ីសាអ៊ូឌីត ។ 

ការបន្ធូរបន្ថយទណ្ឌកម្មនឹងជាការជំរុញដ៏ធំមួយសម្រាប់ប្រធានាធិបតីអ៊ីស្លាមរបស់ប្រទេសស៊ីរី និងជាអតីតមេបញ្ជាការអាល់កៃដាលោក Ahmed al-Sharaa ដែលកំពុងស្វែងរកស្ថិរភាពនៅក្នុងប្រទេសរបស់លោកដែលត្រូវបានបំផ្លាញដោយសារសង្គ្រាមស៊ីវិលរយៈពេលជាង ១ទសវត្សរ៍ ។

លោក Farhan Al-Saleh គឺជាពលរដ្ឋមួយរូបរស់នៅក្នុងទីក្រុងដាម៉ាស់ បានថ្លែងអំណរគុណដល់រជ្ជទាយាទអារ៉ាប៊ីសាអ៊ូឌីតព្រះអង្គម្ចាស់ Mohammad bin Salman ។

លោកបន្តថា ការគាំទ្ររបស់ពួកគេ បាននៅជាមួយពួកយើងចាប់តាំងពីថ្ងៃដែលពួកយើងចាប់ផ្តើមបដិវត្តន៍ពណ៌រហូតមកដល់ពេលឥឡូវនេះ ។

សេតវិមាន និងប្រភពពីររបស់ប្រធានាធិបតីស៊ីរី បាននិយាយថាលោក Trump គ្រោងជួបលោក Sharaa នៅថ្ងៃពុធសប្ដាហ៍នេះ ក្នុងប្រទេសអារ៉ាប៊ីសាអ៊ូឌីត។ 

លោក Trump បាននិយាយថាលោកបានធ្វើការសម្រេចចិត្តបន្ទាប់ពីការពិភាក្សាជាមួយរជ្ជទាយាទអារ៉ាប៊ីសាអ៊ូឌីតព្រះអង្គម្ចាស់ Mohammed bin Salman និងប្រធានាធិបតីទួរគីលោក Tayyip Erdogan ដែលរដ្ឋាភិបាលទាំង ២បានជំរុញយ៉ាងខ្លាំងឲ្យមានការដកទណ្ឌកម្មពីស៊ីរី ។

សូមបញ្ជាក់ថា ទណ្ឌកម្មសហរដ្ឋអាមេរិកដែលបានដាក់ពេលលោក Assad នៅកាន់អំណាចនោះ បានកាត់ផ្តាច់ស៊ីរីចេញពីប្រព័ន្ធហិរញ្ញវត្ថុសកល ហើយនិងរារាំងការវិនិយោគទុនបរទេស និងពាណិជ្ជកម្ម ជាហេតុធ្វើឲ្យប៉ះពាល់ដល់កិច្ចខិតខំស្តាប្រទេសជាតិឡើងវិញ ក្រោយសង្រ្គាម ៕