លោកប្រធានាធិបតី អេម៉ានុយអែល ម៉ាក្រុង (Emmanuel Macron) បាននិយាយកាលពីថ្ងៃអង្គារថា ប្រទេសបារាំង មិនចង់បង្កឲ្យមាន«សង្គ្រាមលោកលើកទី ៣» ជុំវិញការឈ្លានពានរបស់រុស្ស៊ីលើអ៊ុយក្រែនទេ ហើយបានប្តេជ្ញាធ្វើប្រជាមតិលើបញ្ហាសំខាន់ៗ ខណៈដែលលោកបានលើកឡើងពីគោលបំណង សម្រាប់រយៈពេលពីរឆ្នាំ ដែលនៅសល់នៃអាណត្តិរបស់លោក នៅក្នុងការបង្ហាញខ្លួន តាមទូរទស្សន៍យ៉ាងយូរ។

លោក ម៉ាក្រុង ដែលបានឡើងកាន់អំណាចក្នុងឆ្នាំ ២០១៧ ដោយសន្យាថា នឹងមានការផ្លាស់ប្តរសំ  ខាន់ៗ នឹងចុះចេញពីតំណែង នៅឆ្នាំ ២០២៧ បន្ទាប់ពីបានបម្រើការរយៈពេលអតិបរមាពីរអាណត្តិ ដែលត្រូវបានអនុញ្ញាត នៅក្រោមរដ្ឋធម្មនុញ្ញ។

ក្នុងឱកាសមួយកាលពីឆ្នាំមុន លោក ម៉ាក្រុង បានលេចមុខជាអ្នកនយោបាយមួយរូប ជាពិសេសបន្ទាប់ពីការសម្រេចចិត្តរបស់លោក ក្នុងការរៀបចំការបោះឆ្នោតនីតិបញ្ញត្តិ ត្រូវបានគាំទ្រដោយទុកឲ្យគណបក្ស  ស្តាំនិយមជ្រុល ជាគណបក្សធំជាងគេ នៅក្នុងសភា និងគណបក្សរបស់លោកមានសំឡេងគាំទ្រថយចុះទៅវិញ។

ប៉ុន្តែប៉ុន្មានខែថ្មីៗនេះ បានឃើញលោក ម៉ាក្រុង ដែលមានថាមពលថ្មី ដែលត្រូវបានជំរុញដោយវត្តមានរបស់លោក នៅលើឆាកអន្តរជាតិ ខណៈដែលលោកស្វែងរកការបញ្ចប់សង្រ្គាមរយៈពេលបីឆ្នាំ ដែលបង្កឡើងដោយការឈ្លានពានរបស់រុស្ស៊ី លើអ៊ុយក្រែន។

លោក ម៉ាក្រុង បាននិយាយនៅក្នុងបទសម្ភាសន៍ដែលមានរយៈពេលជាង ៣ម៉ោង ថា៖«យើងត្រូវតែជួយអ៊ុយក្រែនការពារខ្លួន ប៉ុន្តែយើងមិនចង់ធ្វើឲ្យមានសង្រ្គាមលោកលើកទី ៣ នោះទេ»។

លោកបានបន្ថែមថា៖ «សង្គ្រាមត្រូវតែបញ្ឈប់ ហើយអ៊ុយក្រែន ត្រូវតែស្ថិតក្នុងស្ថានភាពល្អបំផុត ដើម្បីចូលរួមការចរចា»។

ប៉ុន្តែលោក ម៉ាក្រុង បាននិយាយថា ប្រទេសបារាំងបានត្រៀមខ្លួនរួចជាស្រេច ដើម្បីចាប់ផ្តើមពិភាក្សាជាមួយបណ្តាប្រទេសអឺរ៉ុបផ្សេងទៀត ដែលដាក់ពង្រាយយន្តហោះចម្បាំងរបស់បារាំង ដែលមានអាវុធនុយក្លេអ៊ែរ នៅលើទឹកដីរបស់ពួកគេ ដូចដែលសហរដ្ឋអាមេរិកបានធ្វើដែរនោះ។