អាជ្ញាធរអ៊ីស្រាអែល បានដោះលែងអ្នកជាប់ឃុំប៉ាឡេស្ទីនចំនួន ៩នាក់ ពីតំបន់ហ្កាហ្សា ក្នុងចំណោមមនុស្សរាប់ពាន់នាក់ ដែលត្រូវបានចាប់ខ្លួន អំឡុងពេលធ្វើសកម្មភាពយោធា ក្នុងតំបន់នេះ ចាប់តាំងពីចុងឆ្នាំ ២០២៣។

អ៊ីស្រាអែលបានចាប់ខ្លួនជនជាតិប៉ាឡេស្ទីនជាង ១០.៧០០នាក់ នៅតំបន់វេសបែង ទីក្រុងហ្ស៊េរុយសាឡឹមខាងកើត ( East Jerusalem) និងនៅក្នុងអ៊ីស្រាអែល ចាប់តាំងពីខែតុលា ឆ្នាំ ២០២៣។ ចំនួនអ្នកដែលត្រូវបានចាប់ខ្លួន នៅតំបន់ហ្កាហ្សាស្ទ្រីប ត្រូវបានគេប៉ាន់ប្រមាណថា មានចំនួនរាប់ពាន់នាក់។ នេះបើយោងតាមទីភ្នាក់ងារសារព័ត៌មាន Wafa។ ទោះបីជាយ៉ាងណាក៏ដោយ អាជ្ញាធរពន្ធនាគាររបស់អ៊ីស្រាអែល បានទទួលស្គាល់ថា រហូតមកទល់ខែមេសា មានអ្នកទោសចំនួន ១.៧៤៧នាក់ មកពីតំបន់ហ្កាហ្សា នៅក្នុងពន្ធនាគាររបស់ខ្លួន។

គណៈកម្មាការអ្នកជាប់ឃុំ និងកិច្ចការអតីតអ្នកជាប់ឃុំប៉ាឡេស្ទីន និងសង្គមអ្នកទោសប៉ាឡេស្ទីន ដែលជាអង្គការពីរ ដែលឃ្លាំមើលស្ថានភាពអ្នកទោស បានចោទប្រកាន់អ៊ីស្រាអែលយ៉ាងជាប់លាប់ពីបទអនុវត្ត  ការធ្វើទារុណកម្មប្រឆាំងនឹងប៉ាឡេស្ទីន នៅក្នុងការឃុំឃាំង រួមទាំងការបង្អត់អាហារ ការមិនយកចិត្តទុកដាក់ផ្នែកវេជ្ជសាស្រ្ត ការដាក់អ្នកទោសឲ្យនៅដាច់ដោយឡែកពីគេ និងការរំលោភបំពាន។

អ្នកទោសប៉ាឡេស្ទីនយ៉ាងហោចណាស់ ៦៦នាក់ បានស្លាប់ នៅក្នុងពន្ធនាគាររបស់អ៊ីស្រាអែល ចាប់តាំងពីការផ្ទុះសង្គ្រាមហ្កាហ្សា នៅឆ្នាំ ២០២៣។ ក្នុងចំណោមអ្នកស្លាប់ មាន ៤០នាក់ មកពីតំបន់ហ្កាហ្សា    ស្ទ្រីប។