ប្រធានាធិបតីអាមេរិក លោក ដូណាល់ ត្រាំ បាននិយាយថា រដ្ឋបាលសហរដ្ឋអាមេរិក បានត្រៀមខ្លួនជាស្រេច ក្នុងការដាក់សម្ពាធជាអតិបរមាលើប្រទេសអ៊ីរ៉ង់ និងដកហូតឱកាសរបស់សាធារណរដ្ឋឥស្លាម ក្នុងការនាំចេញប្រេង ប្រសិនបើទីក្រុងវ៉ាស៊ីនតោន និងទីក្រុងតេអេរ៉ង់ បរាជ័យក្នុងការដោះស្រាយកម្មវិធីនុយក្លេអ៊ែររបស់ទីក្រុងតេអេរ៉ង់។

លោកបានប្រាប់វេទិកាវិនិយោគទ្វេភាគី នៅប្រទេសអារ៉ាប៊ីសាអ៊ូឌីត ដែលចាក់ផ្សាយដោយទូរទស្សន៍អាមេរិកថា៖«ខ្ញុំចង់ធ្វើកិច្ចព្រមព្រៀងជាមួយអ៊ីរ៉ង់ ប្រសិនបើខ្ញុំអាចធ្វើកិច្ចព្រមព្រៀងជាមួយអ៊ីរ៉ង់បាន ខ្ញុំនឹងសប្បាយចិត្តណាស់ ហើយយើងនឹងធ្វើឲ្យតំបន់របស់អ្នក និងពិភពលោក ក្លាយជាកន្លែងមានសុវត្ថិភាពជាងមុន។ ប៉ុន្តែប្រសិនបើថ្នាក់ដឹកនាំរបស់អ៊ីរ៉ង់ បដិសេធសំណើនេះ ហើយបន្តវាយប្រហារប្រទេសជិតខាងរបស់ពួកគេ នោះយើងនឹងគ្មានជម្រើសអ្វីក្រៅពីការដាក់សម្ពាធអតិបរមា ជំរុញឲ្យការនាំចេញប្រេងរបស់អ៊ី  រ៉ង់ ធ្លាក់ដល់ចំណុចសូន្យ ដូចខ្ញុំបានធ្វើពីមុនមក។ ដូចអ្នកដឹងហើយថា ប្រទេសរបស់ពួកគេ ស្ទើរតែក្ស័យធនទៅហើយ ដោយសារតែអ្វីដែលខ្ញុំបានធ្វើនោះ។

លោកបានសង្កត់ធ្ងន់ថា ទីក្រុងវ៉ាស៊ីនតោន នឹង«ចាត់វិធានការសព្វបែបយ៉ាង»ដើម្បីរារាំងអ៊ីរ៉ង់មិនឲ្យទទួលបានអាវុធនុយក្លេអ៊ែរ។ លោក ត្រាំ បានបញ្ជាក់ជាថ្មីថា៖«អ៊ីរ៉ង់មិនដែលមានអាវុធនុយក្លេអ៊ែរទេ»។