នាយករដ្ឋមន្រ្តីកាណាដា លោក Mark Carney បានរិះគន់ការអញ្ជើញរបស់ចក្រភពអង់គ្លេស ចំពោះលោក Donald Trump សម្រាប់ដំណើរទស្សនកិច្ចផ្លូវរដ្ឋជាលើកទី២ ដោយលើកឡើងថា វាបានធ្វើឲ្យខូចដល់កិច្ចប្រឹងប្រែងរបស់រដ្ឋាភិបាលលោក ក្នុងការបង្ហាញពីសាមគ្គីភាពប្រឆាំងនឹងការពិភាក្សារបស់ប្រធានាធិបតីសហរដ្ឋអាមេរិក អំពីការបញ្ចូលកាណាដាជាដែនដីឧបសម្ព័ន្ធ។

ចាប់តាំងពីចូលកាន់តំណែង ក្នុងខែមករា លោក Trump បានលើកឡើងម្តងហើយម្តងទៀតថា លោកចង់ឲ្យប្រទេសកាណាដាក្លាយជារដ្ឋទី៥១ របស់សហរដ្ឋអាមេរិក ជាសម្ដីដែលបានធ្វើឲ្យប្រជាជនកាណាដាខឹងសម្បា និងបាននាំឲ្យចក្រភពអង់គ្លេសជួបការលំបាក ក្នុងការព្យាយាមរក្សាទំនងទំនងល្អ រវាងប្រទេសអាមេរិកខាងជើងទាំង២។

ព្រះមហាក្សត្រ Charles របស់ចក្រភពអង់គ្លេស ក៏ជាប្រមុខរដ្ឋរបស់កាណាដា ដែលជាអតីតប្រទេសក្រោមអាណានិគមរបស់អង់គ្លេស ហើយស្ដេចអង្គនេះបានបង្ហាញព្រះឥរិយាបថជានិមិត្តរូបជាច្រើន ក្នុងប៉ុន្មានខែថ្មីៗនេះ ដោយពាក់មេដាយកាណាដា ដាំដើមម៉េផល និងមានព្រះបន្ទូលសំដៅលើព្រះអង្គផ្ទាល់ថា ជាស្តេចនៃប្រទេសកាណាដា។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Sky News លោក Carney ត្រូវបានគេសួរអំពីចំណាត់ការរបស់នាយករដ្ឋមន្ត្រីអង់គ្លេស លោក Keir Starmer កាលពីខែកុម្ភៈ ដែលប្រើប្រាស់ដំណើរទស្សនកិច្ចរបស់លោកទៅកាន់ការិយាល័យប្រធានាធិបតីអាមេរិក Oval Office ដើម្បីប្រគល់លិខិតអញ្ជើញពីព្រះមហាក្សត្រទៅលោក Trump សម្រាប់ដំណើរទស្សនកិច្ចផ្លូវរដ្ឋលើកទី២ ដែលមិនធ្លាប់មានពីមុនមកទៅកាន់ទីក្រុងឡុងដ្រ៍។

លោក Carney បាននិយាយថា៖ «និយាយដោយស្មោះត្រង់ ខ្ញុំគិតថា ពួកគេ (ពលរដ្ឋកាណាដា) មិនចាប់អារម្មណ៍នឹងកាយវិការនោះទេ វាជាពេលដែលយើងកំពុងយល់ច្បាស់ អំពីបញ្ហាជុំវិញអធិបតេយ្យភាព»។

លោក Carney ដែលទទួលបានការគាំទ្រពីគណបក្ស ដើម្បីក្លាយជានាយករដ្ឋមន្ត្រី ក្នុងខែមីនា នៅមុនពេលលោកបានឈ្នះការបោះឆ្នោតរបស់ប្រទេសកាណាដា ក្នុងខែមេសា ដោយការប្តេជ្ញាថា នឹងក្រោកឈរឡើងតទល់លោក Trump នោះ បានសង្កត់ធ្ងន់ថា វត្តមានរបស់ព្រះមហាក្សត្រ Charles នៅក្នុងប្រទេសកាណាដា នៅចុងខែឧសភា គឺកើតមានឡើងដោយការតាំងចិត្ត៕