វិមានក្រឹមឡាំង នៅថ្ងៃពុធ (ទី១៤ ខែឧសភា) នេះ បានរិះគន់ការអត្ថាធិប្បាយរបស់ប្រធានាធិបតីបារាំងលោក Emmanuel Macron ដែលថា ទីក្រុងប៉ារីសបើកចំហឲ្យដាក់ពង្រាយយន្តហោះចម្បាំងបំពាក់អាវុធនុយក្លេអ៊ែរ នៅក្នុងបណ្តាប្រទេសអឺរ៉ុបផ្សេងទៀត ដោយនិយាយថា ចំណាត់ការនោះនឹងមិនធ្វើឲ្យសន្តិសុខរបស់ទ្វីបនេះប្រសើរឡើងនោះទេ។

កាលពីថ្ងៃអង្គារ លោក Macron បានប្រាប់ទូរទស្សន៍ TF1 របស់ប្រទេសបារាំងថា៖ «អាមេរិកមានគ្រាប់បែកនៅលើយន្តហោះ ក្នុងប្រទេសបែលហ្ស៊ិក អាល្លឺម៉ង់ អ៊ីតាលី និងទួរគី»។ ហើយលោកបានបញ្ជាក់ថា៖ «យើងត្រៀមខ្លួនរួចជាស្រេច ដើម្បីបើកការពិភាក្សា។ ខ្ញុំនឹងកំណត់ក្របខ័ណ្ឌក្នុងវិធីដ៏ជាក់លាក់មួយ នៅប៉ុន្មានសប្តាហ៍ និងខែខាងមុខ»។

នៅពេលត្រូវបានសួរអំពីការសម្ដីរបស់លោក Macron អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «ការរីកសាយភាយអាវុធនុយក្លេអ៊ែរ នៅទ្វីបអ៊ឺរ៉ុប គឺជាអ្វីមួយដែលនឹងមិនបន្ថែមសុវត្ថិភាព ការអាចទាយទុកមុនបាន និងស្ថិរភាពនោះឡើយ»។

លោក Peskov បានបន្ថែមថា៖ «ឥឡូវនេះ ប្រព័ន្ធស្ថិរភាព និងសន្តិសុខជាយុទ្ធសាស្រ្តទាំងមូល ស្ថិតក្នុងស្ថានភាពមិនអាចទទួលយកបាន សម្រាប់ហេតុផលជាក់ស្តែង»៕