គណបក្ស Fidesz របស់នាយករដ្ឋមន្រ្តីហុងគ្រី លោក Viktor Orban បានដាក់សេចក្ដីស្នើច្បាប់ទៅសភាដែលនឹងចុះបញ្ជីអង្គការទទួលបានហិរញ្ញប្បទានពីបរទេស និងទប់ស្កាត់សកម្មភាពរបស់ស្ថាប័នទាំងនោះ ប្រសិនបើត្រូវបានចាត់ទុកថា ជាការគំរាមកំហែងដល់អធិបតេយ្យភាពរបស់ប្រទេសហុងគ្រី។

លោក Orban បានសន្យាថា នឹងបង្រ្កាបការផ្តល់មូលនិធិបរទេសដល់ប្រព័ន្ធផ្សព្វផ្សាយឯករាជ្យ អ្នកនយោបាយប្រឆាំង និងអង្គការក្រៅរដ្ឋាភិបាល កាលពីខែមីនា ដោយបានបង្កើនយុទ្ធនាការរបស់លោក មុនការបោះឆ្នោតនៅឆ្នាំ២០២៦ ជាពេលដែលលោកត្រូវប្រឈមនឹងបញ្ហាមិនធ្លាប់មានពីមុនមកពីគណបក្សប្រឆាំងថ្មី។

ច្បាប់ដែលត្រូវបានដាក់ជូនទៅសភាកាលពីល្ងាចថ្ងៃអង្គារ នឹងអនុញ្ញាតឲ្យការិយាល័យការពារអធិបតេយ្យភាព (SPO) បង្កើតបញ្ជីស្ថាប័នទទួលបានមូលនិធិពីបរទេសដែលសកម្មភាពរបស់ពួកគេត្រូវបានចាត់ទុកថា ជាការគំរាមកំហែង។

ស្ថាប័នទាំងនោះអាចត្រូវបានចុះបញ្ជី ប្រសិនបើ SPO កំណត់ថា សកម្មភាពរបស់ពួកគេ «ធ្វើឲ្យខូចលក្ខណៈឯករាជ្យ ប្រជាធិបតេយ្យ និងនីតិរដ្ឋរបស់ហុងគ្រី» ឬបំពានលើអត្តសញ្ញាណរដ្ឋធម្មនុញ្ញ ឬវប្បធម៌គ្រិស្តសាសនារបស់ប្រទេសហុងគ្រី។

អង្គការដែលស្ថិតនៅក្នុងបញ្ជី នឹងត្រូវបានត្រួតពិនិត្យគណនីធនាគាររបស់ពួកគេ ហើយមូលនិធិពីបរទេសដែលត្រូវបានចាត់ទុកថា ជាការគំរាមកំហែងអាចត្រូវបានរារាំង។ ប្រសិនបើសេចក្ដីស្នើច្បាប់នេះត្រូវបានអនុម័ត អាជ្ញាធរនឹងត្រូវបានអនុញ្ញាតឲ្យចូលទៅក្នុងការិយាល័យរបស់អង្គការនានា ហើយពិនិត្យមើលឯកសារ និងឧបករណ៍អេឡិចត្រូនិករបស់ស្ថាប័នទាំងនោះ៕